Shillong, Nohprah 08 (UNI)
Uwei u shipai ka Ri u la shah kem ha ki pulit ka Ri Bhoi na 9 Mer Baridua bad la ïoh ban kurup ïa shibun bah ki kuli, bom, reng jong ki sier bad kiwei na ka ïing sah jong u.
Ka jingkem ïa utei u shipai uba bat ïa ka kyrdan “Junior Commissioned Officer” (JCO) da ki pulit na Pilangkata Outpost bad Umïam ka long hadien ka jingai jingtip ka tnat syntiat jong ki shipai ka Ri.
Katkum ka tyllong khubor na ki pulit, la ïathuh ba ha ka jingkhynra ïa ka ïing shong wai kaba don ha 9 Mer Baridua jong utei u shipai na ka jylla Mizoram, ki bor pulit ki la ïoh ban kurup haduh 1001 tylli ki kuli AK-47, 7 tylli ki kuli LMG 7.62, 14 tylli ki kuli INSAS 5.56, 30 tylli ki kuli .32 pistol, 3 tylli ki synduk kuli ba thylli, uwei u smoke grenade, uwei u hand grenade, 3 tylli ki synduk kuli ba thylli jong ka AK-47, kawei ka shyieng bniat jong u sniang khlaw, 7 tylli ki reng Sier, kawei ka shynrong Sier, bad 34 tylli ki muhor jong ki tnad treikam sorkar bapher bapher.
Na ka liang ki bor pulit ki la kem noh ïa utei u shipai bad la pynngat ruh ïa u ha ki kyndon aiñ kiba ïadei bad kane ka jingshalan be-aiñ ïa ki tiar siat, tiar pynbthei bad ruh katkum ki kyndon aiñ jong ka tnad kaba peit ïa ki mrad khlaw. Ïa ka jingujor pyrshah ïa une u shipai la pynrung ha thanat Khanapara.
Ki heh ka tnat syntiat ki la ïathuh ba utei u shipai u dei u JCO ha ka 42 Rashtriya Rifles ha Jammu and Kashmir, bad u la phet na ka ktem jong ki shipai bad u la rah ruh ryngkat bad u ïa kitei ki kuli da ka jingthmu ban die ïa ki ha Manipur.
“Ka jingtohkit ka dang ïaid ba kumno utei u JCO u la lah ban phet rieh ha ryngkat kiba bun bah ki kuli na Jammu and Kashmir bad ban wan shaduh ka thaiñ Shatei Lam Mihngi,” la ong uwei u heh ka tnat syntiat.
Haba la kylli la utei u JCO uba la shah kem u don jingïadei ne em bad kano-kano ka kynhun lehnoh na Manipur, utei u heh ka tnat syntiat u la ong, “Ngi dang tohkit ïa u na baroh ki liang ban wad la u don jingïadei ne em bad ki seng kieng atiar bad kiei ki kynhun kiba u ïatreilang bad kaei ka jingthmu bad ka thong ka jong u.”
Kham hashwa, haba pynbna ïa katei ka jingshah kem, u Myntri Rangbah, Conrad K Sangma, u la pyntip ha rynsan ‘X’ ba da ka jingtrei shitom jong ki pulit ka Ri-Bhoi, la lah ban pynjem khnap ïa ki bor ka jingdum kiba thmu ban pynkylla sohpdung ïa ka jylla. Hynrei u Conrad um shym la ïathuh ba utei uba la shah kem u dei ruh uba dang trei kum u shipai.
Ha kajuh ka por u la ong ba utei uba shah kem u dei u runar uba la donkti ha kiba bun ki kam be-aiñ naduh ka jingkhaïi ïa ki tiar siat bad haduh ka jingdie be-aiñ ïa ki mrad khlaw nalor ka jingdon ki muhor ban shukor halor ki kot ki sla kiba ïadei bad ki kam sorkar.
