Shillong, Nohprah 08
Ka Sorkar Pdeng ha ka Sngi Thohdieng ka la pyntip ba katkum ka jingkheiñ jingdiah ba la ai da ka North Eastern Indira Gandhi Regional Institute of Health & Medical Sciences (NEIGRIHMS), na ki 2,026 tylli ki kam kiba dei ki ‘Sanctioned Post’ ha kane ka jaka sumar, kiba lait thylli ki long haduh 660 tylli.
Kane ka la paw ha ka jubab ba la ai da ka Myntri Khynnah ka tnat ka koit ka khiah, ka Dr Bharati Pravin Pawar halor ki jingkylli ba la buh da u MP ka Shillong, u Bah Vincent H Pala, ha Lok Sabha.
Halor ka jingkylli la ka dei ne em kaba shisha ba bun bah ki doktor ki la mih noh na katei ka jaka sumar ha kine ki snem, ka Myntri Khynnah ka la ong ba ha kine ki san snem ba la leit noh, ki la don tang katto-katne ki nonghikai kiba la mih noh na NEIGRIHMS namar ki daw bapher bapher.
Nalorkata, ka Myntri Khynnah ka la ïathuh ba ha ki 10 snem ba la leit noh, ka NEIGRIHMS ka la ïoh ïa lai ngut ki Director bapura bad 2 ngut ki Director ba shipor.
Shuh shuh la ïathuh ba na ki 14 tylli ki jingïalang jong ka Governing Council ka NEIGRIHMS, 10 tylli la pynlong ha nongbah New Delhi bad tang 4 tylli ha nongbah Shillong.
