Shillong, Nohprah 08
Ka jingbym tip ïa ki lad ki lynti na ka bynta ban pule ha ki kyrdan kiba kham shajrong wat la ki samla ki thrang naduh ka mynsiem ka lah ban wanrah ka jingpulom bad babe ha ka jingim.
Kumta kane ka phang ka syriem bad ka samla Shimtihun Thabah kaba dang 26 snem ka rta na Sohïong. Kane ka samla ka la hap ban jied ban leit pule Engineering ha Lovely Professional University kaba don ha jylla Punjab hadien ba kam shym la shah jied ban leit pule doktor.
Ka samla Shimtihun Thabah ka la ïoh 85.60 percentage ha ka M.Tech (Transport Engineering) Examination 2023 kaba la shah pynkup burom ha u CEM ka KHADC Bah Pynïaid Sing Syiem ba la pynïaid da ka KSU Sohïong Circle kaba la long ha ka Sngi Thohdieng.
Ka Shimtihun ka la ïathuh ba mar shu dep ïa ka jingpule ka la leit thoh eksam ban pule doktor namar ka kwah palat hynrei namar ha ïing kim da tip ba dei ban leit coaching takadaw ka khlem shah jied.
Haba ïakren kyrpang bad ka samla Shimtihun ka la ïathuh ba ka la leit pule sha Punjab haduh ar snem naduh u 2021 kaba dang ïaid ka khlam covid-19 bad pyndep mynta u snem 2023.
Ka la ïathuh ba ka la pyndep ïa ka matrik na Lamjingshai Secondary School Sohïong bad ka leit XII (Science) sha Lady Keane College, Shillong.
“Haba ka thong jong nga ban long doktor hynrei ngam lah ïa ka eksam namar ngam tip ban leit coaching, kumta ki bahaïing ki phah ban pule sha Regional Institute Science Technology Meghalaya Baridwa Ri Bhoi” ka la ong.
Ka la ïathuh ba namar kam shym la ïoh pule doktor ka la jied noh ïa ka laiñ engineer da kaba leit pule sha Punjab bad ka la wan kyrdan balai ha eksam.
