Shillong, Nohprah:
Ka kynhun jong ki Member of Parliament (MP) na kane ka thaiñ Shatei Lam Mihngi (North East) hapoh ka shatri jong ka North East MPs Forum (NEMPF) ki la pynher jingthoh sha u Myntri ka tnat Korbar Ri, u Amit Shah ban dawa na ka Sorkar Pdeng ban shna ïa ki jaka sah ha nongbah Delhi na ka bynta ki briew kiba dei na kane ka thaiñ kiba don da ki lak ngut naduh ki samla pule bad kiba leit trei bad kiwei kiwei ki jingdonkam.
Ha kane ka jingthoh kaba la phah sha u Amit Shah la soi lang da bun ngut ki MP kiba na kane ka thaiñ kynthup lang ki lai ngut ki MP na kane ka Jylla, u Bah Vincent H Pala, Dr. W.R Kharlukhi bad Agatha K Sangma.
Haba pynpaw shaphang ki jingeh ba ju mad da ki briew na ka thaiñ Shatei Lam Mihngi ha nongbah Delhi kynthup ka jingshah peit ibeiñ, kine ki MP ki la ong ba ki briew na kane ka thaiñ ki la don ha nongbah Delhi na ka bynta bun ki kam nalor kiba leit pule, bad kim kwah ban ïoh ïa jaka sah ba kin long trai ïa ka ïing hynrei ki kwah ka jaka sah kaba ki kot bor ban siew bad biang ki jingdonkam kiba hakhmat eh ha ki jaka sah naduh ka um bad kiwei.
La ong ruh ba bun ki briew na ka thaiñ Shatei Lam Mihngi kiba don ha Delhi, ym tang ba ki mad ka jingshah ibeiñ hynrei ki hap ruh ban mad ïa ka jingrem ka jaka sah bad haba ki wad ïing wai ki trai ïing ki phah siew lypa kum ka jingshngaiñ (security deposit) ha ka dor kaba heh bad haba siew lypa ïa ka pisa, ym don satia kano-kano ka kynja soskular kaba shu thoh ban pyntikna ba ki la dep siew lypa.
La ong ba ynda ki la sah ha ïing wai, ki mad sa ka jingeh ba pynkiew ïa ka bai ïing kaba ki sah, nalor ka jingeh ha ka liang ka jinglong ka riti dustur bad ka rukom bam kaba man ka por ka ju kylla kum ka daw ban mih ka jingthut ha ka shongsuk shongsaiñ.
Kine ki MP na kane ka thaiñ ki ai nuksa ruh ïa ka jingeh ki briew na kane ka thaiñ ha ka por COVID-19 ha Delhi bad ym lah lait ïa ka nongbah Delhi namar ka dei kaba kham hakhmat ha ka liang ka jingleit pule bad wad ki lad kamai.
Namar kata, ki MP ki la buh ka jingtyrwa ba lyngba ka tnat Pynroi Sor ka Sorkar Pdeng lah ban tei ïing kum ki jaka sah kaba tip kum ka Affordable Rental Housing Complexes (ARHCs) hapoh ka skhim Pradhan Mantri Awas Yojana -Urban (PMAY-U) da kaba tyrwa ruh katto katne ki jaka kiba don ha nongbah Delhi.
