Jowai, Nohprah:
U Myntri ka tnat Pule-Dangle ka Sorkar Jylla u Rakkam A Sangma ha ka 5 tarik mynta u bnai u la shim bynta ha ka jingïakynduh lang jong ki nonghikai Upper Primary School Teachers Association (MUPSTA) kaba tip kum ka Special Annual Conference.
Ïa katei ka jingïalang la pynlong ha madan Khawang Ummulong kaba long ruh shibynta ka jingdap 30 snem ka jingïaid lynti jong ka MUPSTA ïa kaba la rakhe halor ka phang “Be a Leader, Be the Difference, Be the Light, Be a teacher.”
Nalor u Myntri ka tnat pule puthi la ïadonlang ruh ka MLA Sutnga Saipung ka Kong Santa Mary Shylla, u Adviser ka tnat pule puthi u Bah HM Shangpliang, u MDC ka Jowai North u Brightstar Chyrmang bad kiwei kiwei.
Ha ka jingkren u Myntri u la ïaroh ïa ki nonghikai kiba la ai ka jingshakri kaba 30 snem. U la kren ruh halor ka kamram jong ki nonghikai ban saiñdur ïa ka lawei jong ki khynnah bad u la kular ban don ryngkat ha kino-kino ki jingdonkam jong ki.
U la ong ba ka sorkar ka ïatakhuh ïa shibun ki jingeh naduh ka jingïapher ka rukom ai tulop, ka jingeh ban pynïapher ïa ki nonghikai sorkar. U la ong ruh ba ki jingdon jingem ha kiba ki skul kim dei ki jong ka sorkar, hynrei ki don ki skul bad kolej kiba ïoh ïa ka jingkyrshan na ka sorkar.
Ka sorkar ka sngewthuh ïa ki jingeh bad dei halor kane la thaw ïa ka State Education Commission bad ngi ap khmih ïa ki jingai jingmut ka commission ban pynbeit bad pynjem ïa ki jingjyrwit jyrwat ha ka pule ka puthi.
U Myntri u la ong shuh shuh ba kaba kongsan eh ka long ban wanrah ïa ka jingïatylli ban jop bad weng ïa ki jingeh bad kum u Myntri u la kular ban leh ïa kaba bha tam ban kyntiew ïa ki nonghikai.
Ha kane ka sngi la pynkup burom ruh ïa ki nonghikai bad pynsngew ruh ïa ka histori jong ka seng bad aiti ruh ïa ka dorkhas ha u Myntri nalorkata la pyllait ruh ïa ka kot sahnam ne ka Souvenier.
La pynphuh pynphieng ïa ka jingïakynduhlang da ki jingrwai jingshad ba la shim bynta da ki nonghikai ha ka jingdonlang ki nonghikai na kylleng ki District ka Jylla.
