Shillong, Nohprah:
Ka Dorbar Shnong Mawlai Mawdatbaki kan pynlong ïa ka jingpynkhuid shnong ha man la ki dong bad ha la ki jong ki tarik ka ban sdang naduh ka 9 tarik bad yn pynkut haduh ka 20 tarik mynta u Nohprah.
Ha u kyrwoh khubor ba la pyllait da u General Secretary ka Dorbar Shnong Mawlai Mawdatbaki u Bah LS Lyngdoh, la ong ba ka Dorbar Shnong Mawlai Mawdatbaki, kumba ju long ka rukom, man la u snem, ka don ïa ki sngi ban pynkhuid shnong ha baroh 8 tylli ki dong jong ka bad khnang ba ki paidbah nongshong shnong bad kumjuh ruh ki nongleit nongwan kin sngewthuh ïa la ka bynta ban ïatreilang bad ka jingpynbeit jong ka Dorbar Shnong; la buh sngi katkum kine ki tarik harum ban pynkhuid ia ka shnong.
Ka jingpynkhuid shnong kan sdang na Dong Nongmali-I ha ka 9 tarik Nohprah, 11 tarik Nohprah ha Dong Nongpathaw, 12 tarik Nohprah ha Dong Umjan, 14 tarik Nohprah ha Dong Pata, 16 tarik Nohprah ha Dong Nongmali-2 bad Dong Nongmali-3, 19 tarik Nohprah ha Dong Mawapkhaw, bad ha ka 20 tarik Nohprah ha Dong Pdengshnong.
Kumta halor kane ka kam trei paidbah jong ki nongshong shnong na ka bynta ka jingkhuid-jingsuba bad ka jingkoit-jingkhiah kaba la long ruh ka dustur ïa kaba ka shnong Mawlai Mawdatbaki ka shim pateng naduh ba la sdang da ki menbarim ban pynkhuid shnong; la kyntu namarkata ïa ki nongshong-shnong, ki nongshong-dukan bad kiwei de kiba don bynta ha ka treikam-treijam hapoh u pud u sam ka shnong Mawlai Mawdatbaki kaba kynthup ruh ïa kito kiba don ïing-aiwai lane jaka-puta ban ïa mih ryntih ha katkum ka sngi pynkhuid ba la buh na ka bynta ki Dong naduh ka por 8:30 baje (mynstep) tat haduh ban da dep ki kam baroh.
Ki nongñiah kali kamai ha ki jaka ba buh Stand Auto-rickshaw/Taxi/Jeep/Pick-up bad kiwei kiwei, ha ka sngi pynkhuid ki dei ban shim ïa la ka bynta ban pynkhuid-pynsuba. Ka jingïaid bad ka jingrung ki kali sha ki bynta ba dang ïaid ka jingtreikam ha ki surok ba shapoh la hap ban pyrkhing bad na ka bynta kane, ki paidbah kiba ïaid ba ïeng bad ki nongñiah-kali ruh kumjuh kin sngewbha ban long kiba ïaishah na ka bynta kane.
