Shillong, Nohprah 08
Ka shnong Mawlai Nonglum, Shillong-17 ka la pynbeit ba kan don ka jingpynkhuid shnong ha ka 15.12.2023. Ka jingpynkhuid shnong kan sdang naduh ka por 8 baje mynstep. Kumta la kyntu ïa baroh ki kali kiba ïaid na Archbishop Dominic Jala Road (Long Round Road), Mawlai Nonglum bad kin ñiah suki bad don akor khnang ban lait na kino-kino ki jingjia ba sngewsih.
Ha kajuh ka por, la kyntu ïa baroh ki kali kit ñiut kumjuh ki kali kit skum kiba ïaid man ka sngi lyngba ka Long Round Road, Mawlai Nonglum ba kin da tap bha ïa ki kali khnang ba ki ñiut ki ñier bad skum kin ym hap ha surok.
Nalor kane, la bthah ruh ïa baroh kito kiba don ïing/jaka hapoh u pud u sam jong ka Mawlai Nonglum ba kin wan ban pynhkuid ïa la ki jaka ha katei ka sngi bad ban ïakynduh ïa ki Rangbah Dong jong kato ka Dong. Kane ka long ka kyrwoh na ki nongïalam shnong ka Mawlai Nonglum.
Ka Dorbar Shnong Jaïaw Laitdom kan pynlong ïa ka jingpynkhuid shnong kaba shisien shi snem ha ka 16.12.2023 naduh ka por 8 baje mynstep. Ka Dorbar Shnong kumta ka kyrpad ïa baroh ki nongshong shnong ban ïa mih ryntih ban pynkhuid ïa ka shnong ka thaw haduh ban da dep pynkhuid. Ha kajuh ka por, la kyrpad ïa ki nongleit nongwan bad ki nongñiah kali ba kin ïaishah bad ïatreilang bad ka Dorbar Shnong. Kane ka long ka kyrwoh na u General Secretary ka Dorbar Shnong Jaïaw Laitdom, Bah H.S. Suting.
Ka Dorbar Shnong Lumkshaid, Shillong ha ryngkat ka jingïatreilang bad ka Shillong Municipal Board kan pynlong ïa ka jingpynkhuid shnong ha ka 18.12.2023 (Lah Sngi U Blei), ka ban sdang naduh ka por 8 baje mynstep.
Kumta la kyntu ïa baroh ki para nongshong shnong ban ïa mih ryntih lang bad ban ïasnohktilang ha kane ka jingpynkhuid shnong khnang ba ka jingthmu ban pynlong ïa ka shnong kaba khuid ba suba kan long kaba jop. Ha kajuh ka por, la bthah ïa ki trai ïing ne trai jaka kiba sah shabar shnong ba kin phah ïa ki briew ban ïarap ne ïakynduh ïa u Rangbah Shnong shuwa jong katei ka tarik. Kane ka long ka kyrwoh na u Secretary ka Dorbar Shnong Lumkshaid, Bah M. Kharkrang.
Ka Dorbar Shnong Wahingdoh kan pynlong ïa ka jingpynkhuid shnong ha ka 09.12.2023 ka ban sdang naduh ka por 7 baje mynstep haduh ka por 1 baje mynsngi. Kumta la kyntu ïa baroh ki nongshong shnong ban ïamih ryntih baroh lang. Ka Dorbar Shnong ka la rai ruh ban ym shah ïa baroh ki kali la kiba na shnong ne nabar ban pynïeng ha baroh shi lynter ki surok shnong ha ka por pynkhuid shnong. Kumta la kyntu ïa baroh ban bud beit bad ryntih khnang ba ka jingpynkhuid shnong kan long kaba ïaid beit ïaid ryntih. Kane ka long ka kyrwoh na u General Secretary ka Dorbar Shnong Wahingdoh, Bah Farewell Nongkynrih.
Ka Dorbar Shnong Lower Lumparing kan pynlong ïa ka jingpynkhuid shnong ha ka 12.12.2023 naduh ka por 8 baje mynstep haduh 1 baje mynsngi. Kumta yn ym shah ïaid ïa ki kali na Lad Ïingmane St. John kiba leit sha Dhobighat kumjuh ym shah ïaid kali na Sanbor Shullai Road, Lower Lumparing ïa ki kali kiba wan na Upper Lumparing bad Dong Shiliang ha ka por jong ka jingpynkhuid shnong. Kane ka long ka kyrwoh na u Rangbah Shnong. Lower Lumparing, Bah D. Shabong.
