Shillong, Nohprah 08
Ka North East Students’ Organisation (NESO) kaba kynthup ïa ka Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) bad ka All Arunachal Pradesh Students’ Union (APSU) kiba dei phra tylli ki kynhun seng kiba don ha hynñiew tylli ki jylla ka thaiñ Shatei Lam Mihngi ka kwah ban pynkynmaw ïa ki nongshong shnong ka thaiñ ba ha ka 11 tarik u Nohprah, 2019, wat hapdeng ka jingpyrshah kaba jur na ki trai-ri trai-muluk jong ka thaiñ ïa ka Citizenship (Amendment) Bill 2019, ka Sorkar India kam shym la sngap bad ha kaba khatduh lyngba ka Rajya Sabha ka la mynjur ïa ka aiñ Ïakjakor kaba la tip kum ka Citizenship (Amendment) Act, 2019.
Ka NESO haba ïadei kane ka la pynbna ba ïa ka 11 tarik Nohprah jong man u snem yn kynmaw beit kum ka ‘Black Day’ na bynta ha ka thaiñ Shatei Lam Mihngi baroh kawei.
“Kumta, ban bteng ïa ka jingkynmaw ïa kane ka ‘Black Day’, ka NESO ka la rai ba kan don ka jingwah ïa ki lama bad ki ‘Banner’ ïong ha man la ki jaka pdeng jong baroh hynñiew tylli ki Jylla ka thaiñ ha ka 11 tarik Nohprah, 2023,” la ong ka kyrwoh na ki nongïalam ka seng.
Ki nongïalam ki la ong ba kane ka sngi ka long ruh ban phah ka kyrwoh sha ka Sorkar India halor ka jingpyrshah ïa ka Citizenship (Amendment) Act 2019, ha kajuh ka por ban pynkynmaw ïa ki briew lajong bad ka pateng ban wan haba ïadei bad sa kawei ka jingleh bym hok ha ka liang ka saiñ hima jong ka Sorkar India pyrshah ïa ki trai-ri trai-muluk jong ka thaiñ Shatei Lam Mihngi.
“Ka NESO kumta, ka khot ka wer ïa baroh ki nongshong shnong ka thaiñ ban kyrshan ïa kane ka sngi, kumjuh ban ïai ïakhun na bynta ka dawbah kaba dei ka hok jong ngi,” pynkut ka kyrwoh.
