New Delhi, Nohprah 10
Ka BJP ka la pynbna ba u Vishnu Deo Sai, uba dei u ‘riewlum bad Myntri Sorkar Pdeng barim, un long u Myntri Rangbah bathymmai ka jylla Chhattisgarh.
Kane ka jingpynbna ha ka Sngi U Blei ka la wan shi taïew thik hadien ba la dep ka jingñiew ‘vote’. Baroh ki 54 ngut ki MLA ka BJP kiba dang shu dep shah jied ki la don da ka jingïalang mynta ka sngi ban jied ïa u nongïalam jong ki u ban long ruh u Myntri Rangbah ka jylla Chhattisgarh.
Ka jingjied ïa u Sai kum u Myntri Rangbah bathymmai ka long hadien ba ka BJP ka la lah ban leh bha ha ki jaka ba don ki ‘riewlum kum ha ka thaiñ Surguja ha kaba ka la jop baroh 14 tylli ki konstitwensi Assembly bad ha Bastar ha kaba ka la jop 8 na ki 12 tylli.
Na ki 90 tylli ki konstitwensi kiba don ha jylla Chhattisgarh, ka BJP ka la jop ha ki 54 tylli katba ka Congress ka la wan ba ar da kaba jop ha ki 35 tylli.
Ha kajuh ka por, u Sai, 59 snem ka rta, u don ka jingïadei kaba jan bad ka Rashtriya Swayamsevak Sangh bad kumjuh ruh bad u Myntri Rangbah barim, u Raman Singh, uba la ïalam ïa ka BJP la bun snem ha Chhattisgarh. U Sai u dei u MLA uba dang shu shah jied na Kunkuri konstitwensi. U Sai u la long MP la saw sien bad ha u snem 2014, u la long kum u Myntri Khynnah ka tnat Steel ha ka sorkar u Narendra Modi.
Haba ai khublei ïa u Modi, u Myntri Korbar Ri, u Amit Shah, President ka BJP, u JP Nadda bad kiwei, u Sai u la ong, “Kum u Myntri Rangbah ngan pyrshang ban pynurlong ïa ki jingkular jong u Myntri Rangbahduh.” U la ong ba ka kam banyngkong ba un leh kan dei ban mang tyngka na ka bynta ban shna 18 lak tylli ki ïing ki sem.
Ha kajuh ka por, ki khubor ki la pynbna ba kin don arngut ki Symbud Myntri Rangbah ha Chhattisgarh bad kita ki kynthup ïa u Arun Sao, uba dei u nongïalam ki Other Backward Classes (OBC) bad u Vijay Sharma uba dei u Brahmin.
Nalorkata, ka BJP ka la rai ba ïa u Myntri Rangbah barim uba la synshar la 15 snem, u Raman Singh, yn pynïakhun na bynta ka shuki Lamphang jong ka Ïingdorbar Thawaiñ ka Chhattisgarh.
