Jowai, Nohprah 10
Ki paid ‘riewngeit ka Balang Katholik ki la wan ïashim bynta ha ka Proseshon Ïukharist ba la pynlong da ka Cathedral Parish, Jowai ha ka Sngi U Blei ha Madan Marian Hill, Jowai.
Shuwa ka jingïaid Proseshon, la pynlong ïa ka jingkñia Mass Ïukharist Bakhuid kaba la pyndep da u Bishop ka Jowai Diocese, u Rev. Ferdinand Dkhar ha ryngkat ka jingsynranlang ki Lyngdoh Sohblei, ki Sister bad ‘riewngeit.
Ha kane sngi la don haduh 120 ngut khynnah kynthei bad shynrang kiba pdiang ïa ka Communion Bakhuid ha ka sien banyngkong.
Ha ka nohphai sngi, ki ‘riewngeit ka Balang ki la shim bynta shitrhem da kaba ïaid kjat ryngkat ki jingrwai jingduwai ban ïaroh ïa U Blei.
Ka jingïaid Proseshon ka la sdang na Marian Hill, Ïawmusiang, Tpep Pale bad mih sha Mission Compound, Ïawmusiang bad pynkut ha Madan Marian.
Hashuwa ban pynwai, la ïoh ka jingkyrkhu Sakrament bakhuid tam ka Duwan na u Bishop, u Rev. Ferdinand Dkhar bad la ïoh ruh ïa ka jingkren shaphang ka jingkhraw jong ka Ïukharist Bakhuid da u Phadar Cresence Roy Laloo.
U Phadar Cresence Roy Laloo ha ka jingkren u la ong ba ka jingim Khristan ka shong nongrim ha ka Ïukharist namar dei ha ka Ïukharist Bakhuid ba u don U Blei uba im bad ka Ïukharist ka dei ka phang pdeng jong ka jingngeit Khristan.
Ka Ïukharist ka don ar bynta – kawei ka dei ka Mass Bakhuid bad kawei ka dei ka jingleit jngoh ïa ka Ïukharist Bakhuid.
U la ong ruh ba ka jingmane ïa ka Ïukharist Bakhuid ka dei ka dak jong ka jingpynthylli ïalade ha U Blei bad ka jinghikai jong ka Balang ka ong, “ka jingmane ïa u Jisu Khrist ha ka Ïukharist Bakhuid, ka dei ka jingithuh ïa uba u long U Blei U Kynrad jong ngi.”
