Shillong, Nohprah 10
U MLA ka Voice of the People Party (VPP) na North-Shillong, Bah Adelbert Nongrum u la ong ba kan bha ïa ka Sorkar Jylla ban ieh noh ïa ka mat halor ka Them Ïew Mawlong kumba ka long lada ka dang hap ban ïapeiñ bad pyndem hakhmat ki nongshong shnong kiba shong ba sah ha katei ka jaka.
“Lada ka Sorkar ka dang hap ban ïapeiñ, ban pyndem kum ki trai ïing hakhmat ki nongshongwai, ieh noh kumba ka long, ym donkam ban ktah eiei…ap ba ka VPP kan wan ha ka bor bad ngin leh la ka jong ka kamram,” la ong u Bah Nongrum.
Haba kynthoh ïa ka Sorkar halor katei ka bynta, u la ong ba shisien ka sngi, baroh ka jaka la long trai da ki paidbah, hynrei la ai pat ïa ka jaka sha ka Sorkar ban pyndonkam na bynta ban shakri ïa ki paidbah.
“Haba ïadei bad ka jingjia ha Them Ïew Mawlong kaba ngi khmih lynti ba kan poi noh sha ka jingïabeit, kaba sngewsih ka long…ngan pynkynmaw ïa ki por ki snem ba la leit noh, la mih ka jingkheiñ ba 184 tylli ki longïing yn pynkynriah na Them Ïew Mawlong sha Quarter ka Shillong Municipal Board – 128 ki dei na Municipal bad 56 na kiwei-kiwei ki tnad treikam,” u la ong.
Ha kawei ka liang, u Bah Nongrum haba pynpaw ka jinglyngngoh halor ka jingmih ki 342 tylli ki longïing, kata sa 158 tylli na ka 184 tylli kaba ka Sorkar kan sa ai jaka na bynta jong ki, u la buh jingkylli, “Ki dei kiei?”
“Nga sngewsih sngewkthang ka mynsiem – ka long ba balei ki briew jong ngi, ki long kum ki nongshongwai ha la ka jong ka ri. Balei ngim pyndonkam ïa ka bor, ka iktiar kum kita ki trai Jylla kumno ban leh ïa kita ki nongshongwai,” la ong utei u nongmihkhmat.
Haba kren halor ka jingduhnong la ka long ha sor ne khappud, u MLA u la pynkynmaw ïa ka jaka kaba 2.29 sq. km ha ka thaiñ Khanapara, Pillangkata kaba la duh ei sha ka Assam ha ka kylla banyngkong jong ka jingïakren pynbeit pud.
“Mynta pat ka Sorkar ka kular ban ai sa 1.4 akar…balei…haduh katno ba ma ngi, ngin don ka jingsngewsynei na bynta kiwei pat. Kine ki dei tang ki nongtrei jong ka Sorkar,” la ong u Bah Nongrum.
Shuh shuh haba pynkynmaw ba ha ka 12 tarik Jymmang mynta u snem u la ai por ïa ka Sorkar ba un leh eiei hi dalade, u la ong ba namar ka jingmih jong ka mat halor ka bhah thung kam ba la ïalam da u nongïalam ka VPP, Bah Ardent M. Basaïawmoit, u la hap ban sangeh noh shuwa naba kane ka long kaba kham donkam na bynta ki samla ka Jylla.
Haba kynthoh biang ïa ka Sorkar halor ka jingbym lah ban pynkynriah ïa ki nongshong shnong na Them Ïew Mawlong, utei u nongmihkhmat ka VPP u la bynrap, “Lehse ka jingïakynduh ha kine ki khyndiat sngi bad ka kular ban ai sa 1.4 akar…ka lah ban dei sa kawei ka jingpynbiej namar ka jingjan jong ka ilekshon MP, MDC.”
