Shillong, Nohprah 10
U CEM ka KHADC Bah Pynïaid Sing Syiem u la ïathuh ba ka Mawlai konstitwensi kaba la bun briew lypa ka la tikna ban kha artylli ki konstitwensi lada ka Dorbar Parliament ka la wanrah ïa ka jingpynkylla ha ka Khyrnit 6.
Haba ïakren bad u Bah Pynïaid u la ïathuh ba ha ki shiphew snem mynshwa kata ha u snem 2013 ha shwa ka ilekshon MDC kan wan ha u snem 2014, ka KHADC ka la pynbeit thymmai ïa ka jingdon briew ki konstitwensi.
U la ong ba mynta ruh ka ilekshon MDC kan sa urlong beit ban long ha u snem 2024 hadien ba ka Delimitation Committee kaba la mynjur da u Lat ka Jylla kan pyndep noh mynta u bnai Nohprah, 2023.
U la pynkynmaw ha u snem 2013 haba ki wanrah ïa ka jingpynbeit thymmai ki la pynduh ïa ka Laitkroh konstitwensi bad pynmih bujli ïa ka Umsning konstitwensi bad mynta kin pynduh ne pynmih konstitwensi thymmai hynrei kin shu pynbeit ban ryngkat ka jingdon briew ha ki konstitwensi.
U Bah Pynïaid u la pyntip ba ka Mawlai konstitwensi kaba la bun briew bad kot 55 hajar ki nongthep vote bad ka Laban konstitwensi ka don tang 12 hajar ngut ki nongthep vote katba ka jingïoh skhim lyngba u MDC ka long mar katjuh.
Nalor kane, u la ong ha ka por ba ka Executive Committee ka bhah skhim la isynei ïa ka Mawlai kaba la bun ki nongthep vote katba kiwei kiba duna briew ki ïoh mar katjuh. Kumta ban ïoh katjuh ki kam pynroi ha ki shnong ki thaw donkam ban pynbeit thymmai.
Shuh shuh u la pynpaw ba lada ka Sorkar India ka wanrah ïa ka jingpynkylla ha ka Khyrnit 6 ha Parliament ka ban kha sa hynriew tylli ki konstitwensi; kaba mut ba ka Mawlai ka la tikna ban ïoh sa kawei ka konstitwensi hynrei ïa mynta yn phiah noh sha kiwei ki konstitwensi ba marjan ban ïa ryntih ka jingdon briew.
U la ïathuh ruh ba ïa ka ilekshon ban long ne ban nym long lashem snem um lah ban ong eiei namar ïa ka ilekshon la pynïaid da ka Sorkar Jylla. Namar kata, u don jingkyrmen ba ka ilekshon MDC kan long beit ha u snem ban wan hadien ba ka ‘Delimitation Committee’ kan pyndep noh mynta u bnai Nohprah khnang ba kin ïoh jingmynjur ha ïingdorbar.
