Shillong, Nohprah 10
U MDC ka Sohïong-Nongspung, Bah Sherborlang Mawlong u la phla ba u leit klas mynstep bad bylla kit daju mynsngi ha Ïewduh ban kyrshan ïalade bad ïa ka ïing ka sem hynrei kita ki jingthait ka met ki jah noh haba pass bha ha ka eksam.
Haba ai jingkren kum u Symbud kongsan ha ka jingïalang sam khusnam ka KSU Sohïong circle ha ka 8 tarik Nohprah 2023, u la pynpaw namar ha ïing ba dang duk u hap ban trei shitom hynrei ka kmie jong u ka kmen haba ïoh result u pass bha.
Kumta u Bah Sherbor u la kyntu ïa ki samla pule ba kim dei ban hun tang lada ki pass klas ba khatar bad klas degree, hynrei ki dei ban trei shitom haduh ban ïoh kam.
U la ong ka kmie kam don por ban sat bha ïa u shñiuh haba ki mareh ban leit buh skul ïa ki khun bad kumta ki khun ki dei ban trei shitom ban pass bha.
“Nga sngew sarong lada ki nong Sohïong ki ïoh kam sorkar, kumta nga kyntu ïa ki samla pule ba kin trei shitom ban ïoh treikam sorkar” u la ong.
Ha kajuh ka por u la ong ba ma u kum u MDC u long kum u kñi ha konstitwensi ban wanrah ka synshar-khadar kaba suk katba u MLA u long kum u kpa ban peit ïa ka khia ka shon ki paidbah ka konstitwensi.
Ha kane ka sngi sam khusnam Maitshaphrang Award kaba 16 ka KSU la donlang u Bah Pynïaid Sing Syiem kum CEM ka KHADC, ki 50 ngut ki samla pule kiba wan shakhmat ha ki jingpule bapher bapher lem bad ki kmie ki kpa.
