Shillong, Nohprah 10
U MLA ka Mawlai konstitwensi, Bah Brightstarwell Marbaniang un mih na Shillong ban leit sha New Delhi lashai ka Lah Sngi U Blei ban pynkhreh ïa ki kot ki sla ban ïakhun hadien ba ka Sorkar Meghalaya ka la ujor sha ïingbishar Supreme Court bym shah ïa ki nonghikai ban long MLA lane ban ïadon bynta ha ki kam saiñ-pyrthei.
Haba ïoh ban ïakren bad u Bah Brightstarwell, u la ïathuh ba lashai ka sngi un leit sha New Delhi ban sngap haba ka Sorkar Jylla kan rah ïa kane ka mat hakhmat ka Supreme Court hadien ba ka la rem ha ïingbishar Meghalaya High Court.
U la ïathuh ba dang ha kine ki khyndiat sngi ka Sorkar Jylla ka la ujor sha Supreme Court bad lashai ka sngi kan rah ïa kane ka mat ha ka sien shong bishar bad un sngap kaei kaba ka ïingbishar kan shim rai lashai.
U la ïathuh ba kane ka jingïakhun kam dei ka jingmyntoi jong u shimet hynrei ka jingïakhun na ka bynta ka jingmyntoi ki nonghikai ki ban sa wan khnang ba kin lah ban ïoh lad ba kin shim bynta ha ka saiñpyrthei.
Shuh shuh u la ong ba ki don bun ki nonghikai kiba bat kam Chairman, Co-Chairman hapoh ka sorkar, ki nonghikai kiba bat kam ha ki seng saiñpyrthei ki donlang bad kane ka kynhun nonghikai ban ïakhun lang ïa kane ka kam ba ka sorkar ka mut khanglad.
Ha kajuh ka por u la ong ba kine ki hynriew ngut ki nonghikai kiba mih shakhmat ban ïakhun ki dei kiba don naduh dang sdang bad haduh mynta haba leit shaduh ka ïingbishar ba hakhlieh ka ri India.
Halor ka jingkyrpad ïa ki paidbah ban noh synñiang haba ïakhun ïa kane ka mukotduma ban pynduh ïa ka hok ki nonghikai skul, u la ong ba ka jinglut kan bun bha bad dei na kata ka daw ki nonghikai ki la kyrpad ïa ki paidbah naba kane ka jingïakhun ka long na ka bynta ka pateng ban wan.
Katkum ka jingkyrpad ki hynriew ngut ki nonghikai sha ki paidbah, la long ba ka jingïakhun ka long ban wanrah biang ïa ka hok tynrai kumba la ai da ka Riti Synshar jong ka ri India bad kumba la ju ai da ka khyrnit kaba 6 bad ba 7 jong ka ‘Rules Regarding the Conduct and Discipline of Employees in Aided Education Institutions’ mynshwa, ban ïada na ka jingmushlia be-aiñ jong ka sorkar ha ki por ban wan, bad lada ym ïeng na ka bynta ka mynta, kan poi ha ka por ba ka sorkar ka lah ban pynkylla ïa kiwei pat ki bynta jong katei ka ‘rule’ kum ka khyrnit kaba 5 bad kiwei kiwei bad synit pynsaja ïa ki nonghikai.
“Ngim dei ki nongtrei sorkar, bad kum ka sorkar kam lah ban lakam ïa ngi da kijuh ki aiñ kumba ka leh ïa ki nongtrei jong ka. Kum ki nongtrei bym dei jong ka sorkar ngi don ki hok bad ka jinglaitluid kaba ka sorkar kam lah ban shu ïuhroit ne knieh noh,” la ong ka jingkyrpad.
“Ngim hap ha ‘Office of Profit’ bad namarkata kam don jingktah lada ngi ïashim bynta ha ka synshar ka khadar namar ngim ïakhun bad ka sorkar,” la ong shuh shuh ka jingkyrpad.
Nalor nangta ki la pynpaw ba lah ban ïashimbynta ha ka imlang ka sahlang ka synshar ka khadar bad kumta ter ter nalor ki kamram ba ngi don kum ki nonghikai.
Ka history ha Meghalaya ka pynpaw tyngkreiñ ïa u synñiang u bynhei jong ki nonghikai ha ka synshar-khadar bad kiwei de ki bynta.
Namar u nongïasïad u la ai jingkheiñ ba ka jinglut na bynta ka mukotduma kan kynjoh sha ka T.10 lak kaba kynthup ïa ka bainong bad ki nongïasaid, bai leit bai wan, na kata ka daw ki hynrei ngut ki nonghikai ki la kyrpad na ki paidbah bad kin noh synñiang sha katei ka T. 10 lak. Kine ki nonghikai ki long u Bah Brightstarwell Marbaniang uba dei u MLA ka VPP na Mawlai, Bah Batskhem Myrboh, Bah Airpeace W Rani, Bah Samborlang Dkhar, Bah Batskhem Marweiñ bad Bah Walter Thabah.
