Shillong, Nohprah:
Ka Tata Motors, India kaba long kawei na ki kompani ba heh tam ha ka jingshna ïa ki kali kamai, ka la pynmih ïa ki kali thymmai jong ka kata ka Intra V70, Intra V20 Gold, bad Ace HT+ ban nang kham pynbha shuh shuh ïa ka rukom pynkit jingkit naduh kaba sdang haduh kaba kut.
Ïa kine ki kali la shna pynwandur ban kit ïa ki jingkit kiba khia bad ha ki lynti kaba jngai ha ka jinglut jingsep kaba duna. Ka Tata Motors ka la shna ruh ïa ki kali kiba kham pynjanai shuh shuh kata ka Intra V50 bad Ace Diesel ban pynduna ïa ka jingbam umphniang bad pynduna ka jinglut jong ki trai kali. La pynmih bun jait ki kali kamai ba thymmai kiba kham rit bad kumjuh ïa ki kali Pickup na ka bynta ki nongthied.
Ka Tata Motors ka wanrah ka jingtyrwa sha ki nongthied da kaba pynmih ïa kine ki kali kiba ki nongpyndonkam ki lah ban shaniah bad kiban ai shibun ki jingshakri kiban ai jingmyntoi, kynthup ïa ka jingshakri kaba pynïasoh ïa kine ki kali, kata ka Fleet Edge telematics system, ka jingsoi ïa ka jingïakut na ka bynta ban pynbna ïa ki kali man la u snem, bad ka Sampoorna Seva 2.0 program.
Kine ki jingshakri ki wanrah ïa ka jingtreikam kaba pura, kaba lait na ki kynrum kynram bad kaba nang kham pynskhem shuh shuh ïa ka jingtreikam jong ka Tata Motors ban ai jingshakri sha ki nongpyndonkam. Haba pyllait ïa kine ki kali, u Girish Wagh, Executive Director, Tata Motors, u ong “Man la ki kali la shna pynwandur ba kin long kiba skhem bad kiba lah ban shaniah ban kit ïa ki jingkit bad ha kajuh ka por ban pyntikna ruh ba kin long kiban ai jingmyntoi ba khraw na ka bynta ki nongpyndonkam bad kumjuh ïa ki trai kali, bad baroh lang kin ïoh ban ai jingshakri na ka bynta ban kyntiew shuh shuh ïa ka ïoh ka kot ka ri India.”
