Shillong, Nohprah 10
Ka kompani Reliance Jio ka dei kaba kham bun eh ban pynsah ïa ka bai bording ilektrik napdeng ki kompani kiba buh tower kiba la shah ot ka bording namar ki khlem siew sha ka Meghalaya Energy Corporation Ltd (MeECL).
Kine ki kompani ki pynïeng ïa ki tower ha kylleng ki jaka na ka bynta ban biang ïa ka kor ïakren lyngba ka phone.
Ka Reliance Jio/Reliance telecom ka don 54 tylli ki tower kiba la shah ot ka bording ilektrik bad ka bai ilektrik kaba pynsah ka long T.226.14 lak.
Hynrei kane kajuh ka kompani ka dang don sa 71 tylli ki tower kiba khlem pat shah ot ka bording ilektrik bad ka bai ilektrik ka bym pat siew ka long T. 33.95 lak.
Ka Aircel/Dishnet ka don 29 tylli ki tower kiba la shah ot ka bording bad ka bai ilektrik kaba pynsah ka long T.131.81 lak, hynrei ki tower kiba dang lait na ka jingshah ot bording ki don 12 tylli bad ka bai ilektrik kaba khlem pat siew ka long T.9.90 lak.
Ka Vodafone ka don 6 tylli ki tower kiba la shah ot ka bording bad ka bai ilektrik kaba pynsah ka long T.23.38 lak, hynrei ki tower ki bym pat shah ot ka bording jong kane ka kompani ki don 20 tylli bad ka bai ilektrik ka bym pat siew na ka bynta kine ki tower ka long T.5.34 lak.
Ka BSNL ka don 6 tylli ki tower ba la shah ot ka bording bad ka bai ilektrik kaba khlem siew ka long T.13.03 lak katba ki tower kiba khlem pat shah ot ka bording ki don 9 tylli bad ka bai ilektrik kaba dang dei ban siew ka long T.3.62 lak.
Lada kheiñ lang lut baroh, ki tower jong ki kompani bapher bapher kiba la shah ot ka bording ilektrik ki don 106 tylli bad ka bai ilektrik kaba ym pat siew ka long T.412.06 lak.
Hynrei ki tower kiba khlem pat shah ot ka bording ilektrik ki don 159 tylli bad ka bai ilektrik kaba dang dei ban siew ka long T.78.12 lak.
Shuh shuh lada kheiñ lang ïa ki tower jong ki kompani kiba la shah ot ka bording ilektrik bad ki tower kiba khlem pat shah ot ka bording ki long 265 tylli. Ka bai bording ilektrik baroh kaba pynsah lada kheiñlang ka long T.490.18 lak.
Kane ka jingkheiñ kaba pynsah ki kompani kiba don tower ïa ka bai bording ilektrik ka dei haduh ka 30 tarik Naiwieng, 2023.
Ka MeECL ka la pyni da ki kam pyrshah ïa kine ki kompani da kaba ot ïa ka bording ilektrik namar ka jingbym siew tista ïa ka bai ilektrik.
Ka tyllong khubor ka ïathuh ba ki don ruh ki kompani kiba leit mudui mukotduma sha Ïingbishar bad ka kam ka dang ïaid ha ka jingbishar.
