Shillong, Nohprah 10
Ka Voice of the People Party (VPP) ka pyrshah jur ïa ki sienjam ba la shim da ka Sorkar Meghalaya Democratic Alliance (MDA) ban ai ei ïa ka jaka kaba heh haduh 1.4 akar hapdeng ka sor Shillong nalor ka 2.4 akar kaba la don lypa ban pynsah ïa ki briew na Them Ïew Mawlong ha kaba bun na ki, ki la dei lypa kiba sah be-aiñ ha ka jaka Sorkar.
“Ka VPP kam don jingujor eiei lada ka Sorkar ka ai jaka sah ïa ki nongtrei Sorkar kiba dei hok ban sah ha ki ïingsah jong ka Sorkar katba ki dang trei ha ka kam,” la ong u dkhot ka Media Cell ka VPP, Dr. Rusievan Shangpliang ha ka kyrwoh khubor.
Ha kawei ka liang, u la ong ba ka jingai jaka sha kitei ki ‘riew paidbah ka long ka bym lah ban peiphang namar ka long shabar na u pud jong ka aiñ bad kam don jingpynshai kaba tikna na ka liang ka Sorkar halor kane ka bynta.
“Lah ban kdew hangne ba ka Sorkar Jylla ha ki por ba la leit ka la dep rai ban ym ai ïa kino-kino ki jaka Sorkar sha ki ‘riewshimet. Hynrei mynta ka kynti pat ka jingshim jong ka Sorkar ïa kane ka rai kaba long da khongpong ïa kaei kaba ka la dep rai teng,” u la ong.
Na ka liang u Dr. Shangpliang u la ong ba ka Sorkar MDA ka dei ban pyni nuksa hangno ka ju ai ïa ki jaka Sorkar sha ki briew jong ka Jylla – kiba duk bad ki bym don jaka puta kumjuh kiba donkam ban ïoh la ka jaka sah.
“Hato ka Sorkar ha ki por ba la dep ka la ju ai jaka ne ïingsah Sorkar sha ki khun ki kti ne ki bahaïing hasem jong ki nongtrei Sorkar? Ki paidbah jong ka Jylla ki kwah ïa ka jingpynshai kaba shong nongrim halor kane ka jingleh palat pud na ka Sorkar,” u la ong.
