Shillong, Nohprah 11
Kumba 20 metric ton u sohniamtra Khasi Mandarin la pynkit ban shalan sha Dubai, kawei na ki nongbah bapaw ha ka thaiñ Middle East kaba don ha United Arab Emirates.
Ïa ka kali kaba kit ïa une u sohniamtra Khasi uba tip da ka kyrteng “Khasi Mandarin” la kaweh lama na IATC Upper Shillong ha ka Lah Sngi U Blei ka 11 tarik Nohprah, 2023 ha ka jingdonlang ka Myntri kaba peit ïa ka tnat rep ka Kong Ampareen Lyngdoh nalor u MLA ka Mylliem u Bah Ronnie V Lyngdoh uba dei ruh u nongïalam ka Liang Pyrshah ha Ïingdorbar Thawaiñ ka Jylla lem bad kiwei kiwei ki ophisar.
Ha kane ka sngi la donlang ruh kiba mihkhmat ïa ka kynhun Apeda bad LuLu group, kiba la batai shaphang ki lad ki lynti bad jingïatreilang kiba pynpoi sha une u pud ban pynkiew ïa ka jingshalan ïa ki mar rep shabar ri.
Haba ai jingkren lyngkot ha kane ka sngi, na ka liang ka Kong Ampareen ka la pynpaw ka jingkmen bad pynpaw ïa ka jingkut jingmut skhem ka Sorkar ban kyrshan ïa ki nongrep bad ai jingkyrmen ban nang pynkhlaiñ ïa ka jingpynkiew ïa ka kam rep bad pynkhlaiñ ïa ka jingïateh ha ka khaïi pateng bad kiwei ki ri.
Kane ka jingjop ban pynïaid ïew ïa u sohniamtra ka la long ruh kawei na jinglah ban pynpoi sha ka thong ban nang pynkiew ïa ki mar rep na kane ka thaiñ ban poi sha ki rynsan ïadei ïathied ha ka pyrthei ka ban pynkiew ïa ka ïoh ka kot bad ka rukom rep kaba neh ha kane ka Jylla.
