Shillong, Nohprah 11
Tang khyndiat sngi hadien ba u Symbud Myntri Rangbah ka Jylla, u Bah Prestone Tynsong u la ïathuh ba ka bai jaka ban shna ïa ka surok Western Bypass ka la rem shaba palat, na ka liang ka Synjuk ki Nongsynshar Shnong Nongthliew Area ha ryngkat ka Hynñiewtrep A.chik National Movement (HANM) ka la phah kyrkieh da ka jingthoh ban ai jingmut ïa ka Sorkar Jylla ban shna ïa kane ka projek na ka surok kaba la don lypa kata na Mawmaram sha Lad Umsaw ha Umïam Ri-Bhoi District ha kaba ka bai shim jaka ruh kan long kaba kham duna lada shna ïa ka projek na kane kajuh ka surok kaba la don lypa.
Ha ka jingthoh kaba la phah sha u Bah Tynsong ha ka Lah Sngi U Blei (11 tarik Noh-prah, 2023), kaba la soi da ki nongkitkam ka Synjuk ki Nongsynshar Shnong Nongthliew Area lem bad ka HANM Eastern West Khasi Hills, ki la pynpaw ka jingdiaw lada ka Jylla kan duh noh ïa ka projek Western Bypass tang namar ka jingrem palat ka bai jaka kumba la dep ban pynpaw da u Symbud Myntri Rangbah dang shen lyngba ki lad pathai khubor.
Na ka liang u President ka HANM Eastern West Khasi Hills u Bah Artis Ryntathiang u la ong ba wat lada ym shym la ïoh ban ïakynduh bad u Symbud Myntri Rangbah, hynrei la shu aiti ïa ka jingthoh sha ka ophis jong u haba ïadei bad ka projek Western Bypass.
U la ïathuh ba na ka liang jong ka seng ha ryngkat ka Synjuk ki Nongsynshar Shnong ynda la dep ban ïakynduh lang la sngewdei ban phah jingthoh sha u Symbud Myntri Rangbah ha ryngkat ka jingai jingmut khnang ban nym duh ei ïa kane ka projek Western Bypass.
Kumta u la ong ba ka jingai jingmut na ka HANM bad ka Synjuk ki Nongsynshar Shnong Nongthliew Area ka long ba ka Sorkar Jylla kan pynïaid noh beit ïa kane ka projek na ka surok kaba rim kaba la don lypa naduh Mawmaram sha Ri-Bhoi ter ter khnang ba ka projek kan nym long lehnohei bad kan long ka jingmyntoi ïa ki paidbah bad lait na ka dheng kali ha Shillong baroh kawei.
U la pynkynmaw ruh ba katto katne snem mynshwa, ka la don teng ka jingleit peit ïa kane ka surok na Mawmaram sha Ri Bhoi da u Myntri Rangbah u Conrad K Sangma.
Dang shen na ka liang u Bah Prestone Tynsong uba peit ïa ka tnat shna surok ha Jylla, u la ïathuh ba ka Sorkar Pdeng ka la mang kumba T.600 klur ban shna ïa ka projek Western Bypass. Hynrei u la pynpaw ka jingdiaw namarba ka bai jaka ban shna ïa kane ka projek ka la rem shaba palat ha kaba ka bai shim jaka la kham rem ar shah ban ïa ka bai shna ïa ka Western Bypass kaba la poi haduh kumba T.1200 klur.
U Bah Tynsong u la ong ruh ba lada ym lah ban pynbeit ïa kane ka jingrem palat ka bai shim jaka, ka Sorkar Pdeng ka lah ban nym mynjur ïa kane bad ka lah ban poi pynban sha u pud ban duh ïa kane ka projek Western Bypass tang na ka daw ka jingrem palat ka bai jaka.
