Shillong, Nohprah 11
Ka Hynñiewtrep Youths’ Council (HYC) ka la dawa na ka sorkar jylla ba ka dei ban ai shwa ka jubab kaba shai sha ki paidbah haduh katno tylli ki longïing ba shong ba sah ha Them Metor ki dei kiba trei ha Shillong Municipal Board bad katno pat ha kiwei kiwei ki tnat jong ka Sorkar.
Kane ka jingdawa ka HYC ban ai jubab shwa ka la long hadien ba na ka liang jong ka Sorkar dang shen ka la pynbna ba kan ai jaka shuh shuh sa kumba 1.4 akar ban shna ïa ki ïing na ka bynta ban pynkynriah noh ïa ki briew na Them Metor, Them Ïew Mawlong.
Haba kren bad u nongthoh khubor ha ka Sngi Nyngkong, u President ka HYC u Bah Roykupar Synrem u la ong ba ka seng naduh kaba sdang ka la dep ban kren shai ba lada ka Sorkar ka thmu ban ai jaka ïa ki nongshong-thap nongshong beaiñ, da lei lei kan nym pdiang, bad lada ka Sorkar ka mut ban ai jaka ïa kiba shongthap, ki dkhot ka jaidbynriew ruh ki bun bah ki bym don jaka, bad u la buh jingkylli, hato ka Sorkar ka kloi mo ban ai jaka ïa kum kita?
U Bah Roykupar u la ong, ka seng kan nym shu sngap, hynrei kan wad jingtip la kita ki 342 tylli ki longïing ki dang dei ne em ki nongtrei hapoh ka Shillong Municipal Board. Lada lap ba ki dei tang kiba shong beaiñ, ka seng kan thaw da kiwei ki lad ki lynti ban leh.
Haba kylli, u la ong ba ka aiñ bat khyndew lane kata ka Land Transfer Act ha ka Jylla ka treikam, hynrei ka seng kan ap namar haduh mynta kam pat shai la ka Sorkar ka ai ei ïa ka jaka lane kan shu shna ïa ki ïing ba kin sah.
Shuh shuh na ka liang une u nongïalam ka HYC u la ong, kumba ka long ïa kiba trei ha ki tnat ka Sorkar Jylla, la ju kynthup lang ïa ka bai ïing (rent allowance) ha ka tulop, hynrei kaba sngew lyngngoh ka long ïa ki briew kiba sah ha Them Metor yn ai ïing kyrpang, nalor ïa kaba la ai kim hun pynbna shuh shuh.
U la ong ba lada peit ha kiwei ki jaka, kane ka Sorkar lada ïatakhuh bad ki para jaidbynriew kiba tam pud ban shong dukan ha ki jaka jong ki tnat Sorkar la ju leh da ka bor ban pynpra, hynrei ïa kine ki briew pat la ailad ban dawa ma ki. Kane ka la pynlong ïa kine ki briew ban nang dawa shuh bad ban nym kheiñ ïa ka bor jong ka Sorkar.
