Shillong, Nohprah 11
Sa shisien pat, ka kynhun ki nongñiah bad nongbud ki kali kit umphniang hapoh ka lama jong ka North East Petroleum Mazdoor Union (NEPMU) ka la byrngem ban ym phah kit umphniang shuh sha Meghalaya naduh ka Sngi Ba-Ar.
Ha ka shithi sha u Commissioner and Secretary ka tnat Food and Civil Supplies ka sorkar Meghalaya ha ka 9 tarik Nohprah, katei ka Union ka la pynpaw ba ki dkhot jong ka kynhun ki dang don sah ha patok ha Nongpoh bad kiwei ki jaka hadien ba ki pulit ka Meghalaya ha ka 24 tarik Naiwieng, 2023 ki la kem ïa ki halor ka jingkynnoh ba ki la donkti ban die tuh ïa ka umphniang ha surokbah ha Ri-Bhoi. Lah ban kdew ba hadien katei ka jingshah kem, ka Union ha ka 27 tarik Naiwieng ka la pynbna ba kan khang ïa ka jingpynpoi umphniang sha jylla. Hynrei ka sorkar ka la khot ïakren bad ki nongïalam jong ka Union ha Nongpoh bad hadien ka jingïakren la rai ban weng noh ïa ka jingpynbna ban sangeh wan kit umphniang sha Meghalaya.
Ha ka shithi sha u Commissioner & Secretary, ka Union ka la ong ba ha katei ka jingïalang, ka sorkar Meghalaya ka la kren shai ba kan ym don ka jingpyndik ba khlem nongrim ïa ki nongñiah bad nongbud ïa ki kali kit umphniang. Ha kaba ïadei bad ka jingshah kem jong ki dkhot, la kyntu ïa ka Union ba kan bud ïa ki kyndon aiñ bad ban wad lynti ban bah jamin ïa ki khnang ba kin lait na patok.
Hynrei na ka liang ka Union ka la ong ba haduh mynta, ym pat don satia napdeng kiba shah kem kiba la lait na patok watla u muktiar jong ki u la ïakhun shitom. Ka Union ka la ong ba kine kiba la shah kem ki la shah pyndik kai. Namar kane ka daw, ka Union ka la ong ba ki dkhot ki la sngewbitar bad la rai ban sangeh noh ka jingwan pynpoi umphniang sha Meghalaya naduh lashai ka sngi.
Ha kawei pat ka liang, ha ka jingïakren bad uwei u heh sorkar, u la ong ba kam lah satia ban long ba ka sorkar kan ïarap ban ai jamin ïa kito kiba la shah kem halor ka jingkynnoh ba ki la donkti ban die tuh ïa ka umphniang.
U la ïathuh ba haduh mynta, ka jingtohkit jong ki pulit ka dang ïaid halor katei ka jingkynnoh ba don ka jingdie tuh ïa ka umphniang ba wan kit ha ki kali na Assam. U la ong ba lada katei ka Union ka sngewdon jingkitkhlieh ïa ki dkhot kiba la shah kem, ka dei ban ïaid katkum ki kyndon aiñ bad ban pan jamin na ka ïingbishar khnang ba kin lait na patok. Ha kaba ïadei bad ka jingdon ka umphniang, utei u heh sorkar u la ïathuh ba kumba ka long mynta ka biang bad ki paidbah kim dei ban sheptieng. Ha kajuh ka por, u la ong ba nalor ki trok kit umphniang jong ki kompani, ki don ruh ki trok shimet kiba ju leit kit umphniang na Assam.
Ha kaba ïadei bad kine ki trok shimet, u la ong ba ka sorkar ka la bthah ïa ki pulit ka jylla ban ïakren bad ki pulit ka jylla Assam ban pynthikna ba ki nongñiah kin ym ïakynduh jingeh haba ki leit kit umphniang. Lada donkam, la bthah da ki Deputy Commissioner ba kin pynbeit bad ki SP na ka bynta ban pynbiang pulit pahara ïa ki trok kiba kit umphniang na Assam bad kiba dei ban rung sha Meghalaya.
