Shillong, Nohprah 11
Ka Dorbar Shnong Mawlai Mawroh kan pynlong ïa ka jingpynkhuid shnong ha ka 18 tarik mynta u Nohprah, bad ha kane ka sngi ka shnong kan pynlong shwa ïa ka jingkynmaw burom ïa u Myllung Soso Tham.
Katkum u kyrwoh khubor ba la pyllait da u Rangbah Shnong Bah Peter G Lamare bad General Secretary Bah T. Hynñiewta, la ong ba kan don ka jingai jingkren ha katei ka sngi shaphang u Myllung Soso Tham kum ka jingkynmaw burom bad hadien kata yn sa sdang ka jingpynkhuid shnong naduh ka por 9 baje mynstep.
Kumta la kyntu ïa baroh ki nongshong shnong ban mih ryntih la kumno-kumno iwei lane ar ngut shi ïing bad rah la ki jong ki tiar trei. Kito kiba don jaka puta bad don ïing don sem ki bym sah ha shnong Mawroh, ki dei ban wan sha kane ka jingpynkhuid shnong bad ki dei ban ïakynduh ïa ki Rangbah Dong.
Kiba shong ki dukan bapher bapher, ki karkhana, ki trai Guest House/Homestay, Restaurant, ophis Sorkar, ophis shimet, ki skul bad kiwei kiwei ki jaka pule ki dei ban mih ryntih ha kane ka jingpynkhuid shnong. Lada don ki bym wan ne pep, kin shah pynshitom katkum ka rai jong ka Dorbar Shnong bad ki Rangbah Dong kin sa peit bha ha la ki jong ki dong jong ki ïa ka jingwan ki briew ban pynkhuid bad ba ka jingpynkhuid ka dei ban long kaba biang. Na ka bynta ka jingdih sha dih dud ka shong ha ka jingpynbeit jong ki Rangbah Dong.
