Shillong, Nohprah:
Ka Toyota Kirloskar Motor (TKM), da ka jingsngew sarong ka la pynbna ïa ka jingïatreilang bad ka tamasa ba pawnam ka Hornbill Music Festival ha Nagaland, India, ha ka snem kaba ar lyngba ka jingkyrshan pisa. Ka tamasa ka tem ka put ïa kaba la tip kum ka Hornbill Music Festival, la pynlong ha Naga Heritage Village ha Kisama, Nagaland, naduh ka 1 tarik haduh 10 tarik U Nohprah, 2023. Ka jingïatehlok bad ka TKM ha kane ka tamasa ka ïahap bad ki jingtreikam kiba ïadei bad ka imlang-sahlang, kaba thmu ban pynneh-pynsah ïa ki riti-dustur bad ki matti ki longshwa.
Ka tamasa Hornbill Festival, ka dei ka tamasa ba ju pynlong haduh 10 sngi lynter ban pyni ïa ka riti dustur jong ka Nagaland, da kaba pyni ïa ki jingpyninam kiba ïadei bad ka kolshor bad ki riti ki lariti jong ki paid riewlum Naga. Ïa kane ka lympung la pynlong da ka tnad Tourism bad ka tnad Art & Culture, kaba pyni ïa ka tem ka put jong ki paid riewlum Naga, ki jingshad, ki bam ki dih, ka siat khnam, ka jingïalehkai lympat, ki jingïalehkai tynrai bad ki jingïalehkai kilan met. Ha ka sngi plie la ïadon lang ki nongïalam ba ha khlieh na Kirloskar Systems, TKM, bad Toyota Tsusho Insurance Broker India. Ha kane ka lympung la don lang ruh ki shnat kiba ïatreikam lang na Toyota and Okusa Toyota. Haba kren shaphang ka jingïatreilang jong ka TKM bad ka tamasa Hornbill Music Festival 2023, u Varinder Kumar Wadhwa, General Manager – Strategic Business Unit (East) jong ka Toyota Kirloskar Motor, u ong, “Ka jingsaiñdur jong ka TKM ïa ka rynsan ban pyni ïa ki kali ba bun jait kynthup ruh ïa ka kali kaba la shna pynwandur kata ka Hilux na ka bynta ki nongap pahara ïa ki khlaw, ka pyni ïa ka jingsngew kmen jong ngi ban pyni ïa ki bun jait ki mar jong ngi, kaba thmu ban pynïoh ïa ki kali na ka bynta jong baroh ne ka ‘Mobility for All’ khnang ban ïoh mad ïa kiei kiei kiba sngewtynnad.”
