Shillong, Nohprah 11
Ka Petroleum Dealers’ Association of Meghalaya (PDAM) ka la rai ban leit kit beit ïa ka umphniang na Assam wat hapdeng ka jingbyrngem jong ka North East Petroleum Mazdoor Union (NEPMU) ban ym pynpoi umphniang shuh sha ka Jylla naduh ka Sngi Ba-ar.
“Ki kali jong ngi kin leit kit beit ïa ka umphniang lada kito kiba dei ban wan pynpoi kim wan,” ong u President ka PDAM, Bah Kennedy Khyriem ha ka Lah Sngi U Blei.
U la ong ruh ba ki don ar jait ki kali kit umphniang – jong ki trai jaka theh umphniang bad ki ‘Transporter Tanker’ ne kito kiba la don jingïateh bad ki kompeni umphniang kum ka Indian Oil, Hindustan Petroleum, Bharat Petroleum bad kiwei-kiwei.
Haba kylli, u la ong ba ka umphniang kaba dang sah bad u mynta ka dang dap na bynta 3-4 sngi.
“Ngi la dep ïakren ruh bad ki para trai jong ki jaka theh umphniang ban pynbiang ïa ka umphniang,” u la ong.
Haba pynsngew ba ka Sorkar Jylla ka la bthah ban ïaid beit shakhmat ha ka ban leit kit ïa ka umphniang na Assam, u Bah Khyriem u la ong ba lada donkam, ka Sorkar kan pynbiang ruh ïa ki pulit ki ban synran lang ïa ki kali kit umphniang naduh jaka kit haduh Byrnihat ne Nongpoh.
“Nga la ïakren mynne bad u Myntri ka tnad ba dei khmih bad u la ong ban ïaid beit shakhmat bad lada donkam yn phah synran lang da ki pulit. U Myntri u la ong ruh ba un sa ïakren bad ka Sorkar Assam haba ïadei bad kane ka bynta,” u la ong da kaba bynrap ba kane kan ym don jingthut satia.
Haba kdew ba ka mar kum ka ‘Petrol’, ‘Diesel’, umphniang sharak bad LPG ki hap hapoh ka thup ‘Essential Commodities’ kiba donkam man ka sngi da u briew, u President u la ong ba ka Sorkar ka dei ban leh eiei lada katei ka NEPMU ka thmu ban ïaid shakhmat bad katei ka rai jong ka.
Halor ka jingdawa jong ka seng ban pyllait noh ïa kiba shah kem, u la ong ba kane baroh ka shong ha ka ïingbishar bad ka Sorkar kam lah ban leh eiei haba ïadei bad kane ka bynta.
Na ka liang u President, u la ïathuh ba katkum ka jingïoh jingtip na ki nongñiah kali, ka NEPMU kan sa shong jingïalang ha ka Sngi Ba-ar ban shim rai la kan ïaid beit ne sangeh noh shuwa ïa katei ka jingbyrngem jong ka.
U la bynrap ba ka PDAM kan sa shong jingïalang ha ka Sngi Ba-ar ban pyrkhat halor katei ka kam.
Ha ka shithi sha u Commissioner & Secretary ka tnad Food and Civil Supplies ka Sorkar Meghalaya, katei ka kynhun ka la pynpaw ba ki dkhot jong ka ki dang don sah ha along ha Nongpoh bad kiwei ki jaka hadien ba ki pulit ka Meghalaya ha ka 24 tarik Naiwieng, 2023 ki la kem ïa ki halor ka jingkynnoh ba ki la donkti ban die tuh ïa ka umphniang ha surokbah ha Ri-Bhoi.
Lah ban kdew ba hadien katei ka jingshah kem, ka kynhun ha ka 27 tarik Naiwieng ka la pynbna ba kan khang ïa ka jingpynpoi umphniang sha Jylla. Hynrei ka Sorkar ka la khot ïakren bad ki nongïalam jong ka NEPMU ha Nongpoh bad hadien ka jingïakren la rai ban weng noh ïa ka jingpynbna ban sangeh wan kit umphniang sha Meghalaya.
