Shillong, Nohprah 11
U Myntri Rangbahduh ka ri, u Narendra Modi ha ka Lah Sngi U Blei u la pyllait paidbah ïa ka ‘Viksit Bharat @2047: Voice of Youth’ lyngba ka ‘video conferencing’.
U Myntri Rangbahduh u la ai jingkren ha ki Vice-Chancellor jong ki skulbah, ki khliehduh jong ki jaka pule bad ki nonghikai ha ki ‘workshop’ ba la pynlong ha ki Raj Bhawan ha kylleng ka ri ban rakhe ïa ka jingsdang jong kane ka sienjam.Ha Meghalaya, ka Raj Bhavan, Shillong ka la pynlong ïa ka prokram ha kaba la don ka jingpyni ‘live’ ïa kane ka prokram.
Ha kajuh ka por, la pynlong ïa ka ‘workshop’ kum shi bynta jong ka prokram halor ka phang-pdeng, “Empowered Indian” bad “Thriving and Sustainable Economy”.
U Lat ka Jylla Meghalaya bad u Myntri Rangbah ki la ïadonlang ha kane ka prokram bad ha ka ‘workshop’ la sakhi ïa ki jingïalang ïamir jingmut jong ki khlieh duh jong ki jaka pule, ki nonghikai bad ki samla pule kum kito kiba don bynta na ka bynta ka India kaba la kiew shaphrang.
Ki ‘workshop’ ki long ka sienjam ba kongsan sha ka jingsdang ïa ka kam ban kynthup ïa ki samla ban ïasam ïa ki jingai jingmut jong ki na ka bynta ka Viksit Bharat @2047.
U Myntri Rangbahduh ha ka jingai jingkren u la kdew ïa ka bynta kaba khraw jong ki jaka pule ha ka jingkyntiew ïa ka jingmut jingpyrkhat jong u briew bad ong ba ka ri ka lah ban kiew shaphrang tang lyngba ka jingkiew shaphrang ki briew jong ka. U Modi u la ban jur halor ka jingdonkam ban buh ka thong ïa ka bor jong ki khynnah bad ki samla pule ha man ki skulbah khnang ban pynurlong ïa ka ‘Viksit Bharat’. Da kaba pdiang ïa ka jingdon ki jingmut jingpyrkhat bapher-bapher, u Myntri Rangbahduh u la ong ba dei ban pynïatylli ïa kine baroh na ka bynta ka jingtei ïa ka India kaba la kiew shaphrang. U Modi u la kyntu ïa baroh ba kin trei borbah na ka bynta ka jingpynurlong ïa ka Viksit Bharat@2047. U la ai jingmut ban pynlong ïa ki prokram ba kyrpang ha man ki kolej bad ki skulbah ha ka ri ban pynïasoh shuh-shuh ïa ki samla bad kane ka jingthmu. U Myntri Rangbahduh u la kren shaphang ka jingplie ïa ka rynsan ‘Ideas Portal’ kaba ïadei bad ka Viskit Bharat bad u la pyntip ba lah ban ai jingmut ha ki san tylli ki phang.
Ha ka jingai jingkren ha ka jingïalang, u Lat ka Jylla Meghalaya, u Phagu Chauhan u la kyrpad ïa ki samla ban peit ïa ka rynsan jong ka Viksit Bharat ba la shna da ka Sorkar bad ‘upload’ ïa ki jingsngew bad ki jingai jingmut jong ki ha kane ka rynsan hashuwa ka 25 tarik Nohprah 2023.
“Kine ki jingai jingmut, bad ki sienjam pynkhreh kam kan ïarap ïa ka Sorkar ban wanrah ïa ki polisi bad ïarap ruh ban kot sha ka thong ban pynlong ïa ka India ka ri kaba la kiew shaphrang hashuwa u snem 2047,” bynrap u Lat.
U Myntri Rangbah ka Jylla Meghalaya, u Conrad Sangma ha ka jingai jingkren ha ka jingïalang u la ong ba ki samla ki long ki kabu ba khraw tam jong kano-kano ka ri ha kaba ki long ruh ki jingeh kiba heh tam.
U la ong, “Bad nga ïai ban ïa kane hajan man ki prokram ba nga leit haba nga kren sha ki samla, ki samla haba ki shah ïalam bakla, ki long ka bor jong ka jingpulom lut baroh ha ka ri. Haba ki shah ïalam ha ka lynti kaba dei, ki lah ban long ka bor kaba khraw tam ha ka jingtei ïa ka ri. Dei namar kata ka long kaba donkam ba ngin tei ïa ka rukom pyrkhat kaba dei bad ïalam lynti ïa ki samla ha ka lynti kaba dei khnang ba kin lah ban long ka bor jong ka jingtei ïa ka ri kaba ngim pat ju ïohi ha ka histori.”
Shuh shuh u Myntri Rangbah u la ai khublei ïa u Myntri Rangbahduh na ka bynta kane ka thong jong ka Viksit Bharat hashuwa u snem 2047 da kaba bynrap, “Kano-kano ka Ri, kano-kano ka Jylla lane kano-kano ka kynhun kam lah ban ïaid shakhmat khlem ka thong.”
