Shillong, Nohprah 11
U Superintendent of Police (SP) ka East Jaiñtia Hills u la wan mih hakhmat ki nongbishar ka Meghalaya High Court ha ka Lah Sngi U Blei bad u la pyni ba ki pulit ki la shim ïa ki sienjam ban ïakhun pyrshah ïa ka jingtih bad jingkit dewïong be-aiñ ha kane ka distrik.
Ha kajuh ka por, u SP u la pyntip ba ki pulit ki la kurup noh ïa u dewïong uba don 4,800 MT. Une u dewïong u dei uba la kurup najan ka Don Bosco College, Byndihati. Ka jinglap ïa une u dewïong ka la paw ha ka kaiphod kaba 18 jong u Justice BP Katakey (Retired).
Ïa mynta, ka High Court ka la pynpaw ba ka jingwan jong u SP ka East Jaiñtia Hills sha ïingbishar kam long shuh kaba donkam bad yn hap ban shu ap bad peit shwa ha ki sngi ki ban wan lada ka dang don eiei halor kane ka bynta.
Na ka liang u Advocate General u la ong ba haduh mynta, u Justice BP Katakey (Retired) u khlem pat ai ïa ka kaiphod bathymmai hadien katei ka kaiphod ba 18. Ka ïingbishar ka la ong ba khlem da ïoh shwa ïa ka kaiphod bathymmai, yn ym lah ban pynmih kano-kano ka hukum.
Ka High Court ka la bthah ba ka jingbishar kan long biang ha ka 19 tarik Nohprah ban ap ïa ka kaiphod na u Justice Katakey halor ka jingpan jubab jong u na u Deputy Commissioner ka East Jaiñtia Hills ha kaba ïadei bad u dewïong uba u Justice Katakey u la lap katkum ba la paw ha ka kaiphod kaba 18.
Hynrei hadien ba la kut ka jingbishar, u Court Master u la pyntip ba u Justice Katakey u la aiti sha ka High Court ïa ka kaiphod ba 19.
Ha kawei pat ka liang, la pyntip ba dang sah sa 5,50,000 MT u dewïong ba la dep ban kheiñ bad uba hap ban kit bad die lilam da ka Coal India bad katkum ka jingbthah jong u Justice Katakey, ïa une u dewïong dei ban kit bad die lilam hapoh mynta u bnai. Ka High Court ka la ong ba la khmih lynti ba yn bud ïa ka por ba la buh bad ban pyndep ïa ka jingkit bad jingdie lilam ïa une u dewïong hashwa ban kut snem.
