Shillong, Nohprah 11
Ka Khasi Students’ Union (KSU), ka seng kaba ïadonlang hapoh ka shatri jong ka North East Students’ Organisation (NESO) ha ka Lah Sngi U Blei ka la wah ïa ki lama ïong bad ki ‘Banner’ ha katto-katne ki jaka jong ka sor Shillong kum ka dak ban pynpaw ka jingpyrshah ïa ka aiñ Ïakjakor kaba la tip kum ka Citizenship (Amend-ment) Act, 2019 (CAA).
“Kane ka long katkum ka jingbthah jong ka NESO. Naduh u snem 2019, ngi la kynmaw ïa kane ka sngi (11 tarik Nohprah) kum ka ‘Black Day’,” la ong u General Secretary ka KSU, samla Donald V. Thabah.
Ïa kitei ki lama ïong bad ‘Banner’ la wah ha Motphran, Khyndai-Lad bad hakhmat u mot-dur ba shi rynïeng jong u Kiang Nangbah hajan Shillong Civil Hospital.
Haba kdew ba ka CAA ka shah ïa ki poiwir na kiwei pat ki ri ban long nongshong shnong ha India, utei u nongïalam u la pynkynmaw ba ka Jylla ka don ïa ka khappud bad ka Bangladesh bad ha ki snem 1970, ki la don ki nongshong shnong na katei ka ri kiba la wan poi sha ka Jylla namar jong ka thma Bangladesh Liberation War.
“Kine ki briew ki ïoh ban long nongshong shnong bad ki sdang ban leh trai shnong, ha kawei ka liang kaba la ïalam sha ka jingmih jong shibun kiei-kiei,” u la ong.
Ha kajuh ka por, haba pynsngew ba ka jingdon jong ki Bengali kiba dei ki Hindu ha katei ka ri (Bangladesh) ka long kumba 1.3 klur, u samla Thabah u la ong ba lada kitei ki bar-ri ki shim ka rai ban wan sha kane ka Jylla, kata kan sa ktah shi kat dei ïa ki paid nongshong shnong ka Meghalaya.
“Ngin ïai pynpaw ïa ka jingpyrshah jong ngi lem bad kiwei ki Jylla ka thaiñ Shatei Lam Mihngi bad ngin bteng ban kynmaw ïa kane ka sngi kum ka ‘Black Day’,” u la ong.
Ka North East Students’ Organisation (NESO) kaba kynthup ïa ka Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) bad ka All Arunachal Pradesh Students’ Union (AAPSU) – ki 8 tylli ki kynhun seng ha ki 7 tylli ki Jylla ka thaiñ Shatei Lam Mihngi ka kwah ban pynkynmaw ïa ki nongshong shnong ka thaiñ ba ha ka 11 tarik u Nohprah, 2019, wat hapdeng ka jingpyrshah kaba jur na ki trai-ri trai-muluk jong ka thaiñ ïa ka Citizenship (Amendment) Bill 2019, ka Sorkar India kam shym la sngap bad ha kaba khatduh lyngba ka Rajya Sabha ka la mynjur ïa ka aiñ Ïakjakor kaba la tip kum ka Citizenship (Amendment) Act, 2019.
Ka NESO haba ïadei kane ka la pynbna ba ïa ka 11 tarik Nohprah jong man u snem yn kynmaw beit kum ka ‘Black Day’ na bynta ha ka thaiñ Shatei Lam Mihngi baroh kawei.
Hashuwa, ki nongïalam ka NESO ha ka kyrwoh ki la ong ba kane ka sngi ka long ban phah ka kyrwoh sha ka Sorkar India halor ka jingpyrshah ïa ka CAA, ha kajuh ka por, ban pynkynmaw ïa ki briew lajong bad ka pateng ban wan haba ïadei bad sa kawei ka jingleh bym hok ha ka liang ka saiñ hima jong ka Sorkar India pyrshah ïa ki trai-ri trai-muluk jong ka thaiñ Shatei Lam Mihngi.
