Nongpoh, Nohprah 11
Kumba shiphew ngut ki runar ki la ïoh ban prong tuh hapoh kawei ka kudam buh sikret jong ka kompani ITC Limited, kaba la pynïaid da ka Madan Mohan Obhrai & CO WSP ha 15 Mer, Ri Bhoi District. Kane ka la jia ha ka por kumba 1 baje eiei jong ka shiteng synñia Lah Sngi U Blei.
Katkum ka tyllong khubor ba la ïoh lum na ki pulit, la ïathuh ba kitei ki runar ki la ïoh rung tuh hapoh katei ka kudam da kaba pyndonkam da ka jingkieng. Ynda haba ki la ïoh rung ha phyllaw, ki la teh ïa ki kti ki kjat jong lai ngut ki nongap pahara katei ka kudam bad teh ruh da ka ‘gamcha’ ha ka durkhmat jong kitei ki nongap pahara.
La ïathuh ruh ba hadien ka jingteh jingkhum bad da ïa ki khmat jong kitei nongap pahara, kitei ki runar ki la pynpait pat ïa ar tylli ki tala jong ka kudam da kaba pyndonkam da u nar rod. Ynda haba ki ïoh ban rung shapoh ka kudam, ki runar ki la pynphai ruh ïa ka kor ringdur (CCTV camera) shajrong khnang ba kan nym ïoh ringdur ïa katei ka kam tuh kam thiem ka jong ki.
Ki pulit ki la ïathuh ruh ba ha kane ka jingjia, kitei ki runar ki la ïoh ban tuh haduh 255 synduk sikret nalor ka Router, ka DVR bad CPU jong katei ka kudam. Halor kane ka jingjia, na ka liang ki pulit ka Ri Bhoi mynta ki dang pynlong ïa ka jingtohkit ban ïoh kem ïa ki runar kiba donkti ha kane ka kam tuh.
