Nongstoiñ, Nohprah 11
Uwei u briew u la duh noh ïa la ka jingim katba uwei pat u la mynsaw jur hadien ba ki la shah shoh bad shah lute ha ki runar ki bym lah ban tip ki dei kiei ha ka shnong Mynniar.
Katkum ka khubor kaba la ïoh na ki pulit la ong ba ha ka janmiet jong ka 11 tarik mynta u bnai, ar ngut ki briew kiba la tip kyrteng kum u S Chetri, 49 snem bad u TR Sangma, 48 snem, kiba dei baroh ar ngut ki nonghikai jong ka skul Rangsapara Secondary, katba ki dang mih na Nongstoiñ ban leit sha Rangsapara da ka thuk-thuk, hynrei ha ka por ba poi ha shnong Mynniar ki la shah khang lynti noh ha ka kynhun ki runar ki bym lah ban ithuh satia.
La ong ba hadien ba la shah khang lynti, kine ar ngut ki briew kiba dei ki nonghikai, ki la shah shoh shah tied ha ban da jem jai. Ki runar shwa ba kin phet na kane ka jaka ki la lute ïa ka pisa bad kiwei ki tiar ki tar.
Shuh shuh la ong ruh hadien ba ki runar ki la phet, na ka liang ki briew kiba lap ïa kine ki ar ngut, ki la pynkit noh mar-mar sha ka jaka ai jingsumar ha Nongstoiñ Civil Hospital ban pynïoh ka jingsumar, hynrei u T.R Sangma u la khlad noh namar ka jingjur jong ka jingmynsaw.
Na ka liang jong ki pulit hadien ba ki la pyndep ïa baroh ki jingdonkam katkum ki kyndon jong ka aiñ bad la ong ba ïa ka post mortem yn sa pyndep lashai ka sngi.
Ki pulit mynta ki la pynjur ïa ka jingthwet ban ïoh kem noh ïa kitei ki runar kiba la donkti ha katei ka kam bad la kyrpad ruh ïa kino-kino kiba don jingtip ba kin ai jingtip.
