Shillong, Nohprah 11
U Symbud Myntri Rangbah ka Jylla ha ka Lah Sngi U Blei haba kynthoh tyngeh ïa ka jingleh politik bad thmu ïalam bakla ïa ki paidbah, u la bthah ïa ka Voice of the People Party (VPP) ba kan kiar na ka jingleh politik ïa ka kam ba ïadei bad ka jingpynkynriah ïa ki 342 tylli ki longïing na Them Metor, Them Ïew Mawlong.
“Kiar na kaba leh politik ïa kane ka kam bad ka rai kaba la shim da ka sorkar ban pynkynriah ïa ki briew na Them Metor sha ka jaka ba long trai da ka Shillong Municipal Board (SMB) bad lada phi kwah ban shai, wan ïakynduh ïa nga, ngan batai bniah lut ïa kiei-kiei baroh ba phin shai pura,” la ong u Bah Prestone haba kren sha ki lad pathai khubor ha ka Lah Sngi U Blei.
Kane ka jingkynthoh u Bah Prestone ka long shisngi hadien ba ka VPP ka la pyrshah ïa ka rai jong ka Sorkar ban nang ai jaka shuh shuh na ka bynta ban pynkynriah ïa ki briew na Them Metor.
U Symbud Myntri Rangbah u la ong, “Kito ki nongïalam kiba la pynrem bad kynthoh ïa ka rai ba la shim da ka Sorkar, ki dei tang kiba kwah leh politik. Ka dei tang ka jingthmu leh politik khlem da tip ïa ki jingshisha, khlem da tip ïa ka jingdon ki nongshong shnong ha katei ka jaka. Namar kata, ngam kwah ban ïatai nia, ngam kwah ban pynlut kai ïa ka por bad kum kine mat kaba ki wanrah”.
“Haba ngi ong ba ngi donkam jaka biang sa kumba 1.4 akar ka mut ba kane ka jaka kam dei ba ngin ai sha kine ki briew. Ïa kane ka jaka yn aiti sha ka Shillong Municipal Board. Kam dei ba kin long trai ma ki namar ka jaka ka dei jong ka municipal. Dei namar kane, ba nga ong sngewbha wat ïaleh politik eiei. Lada phi donkam jingpynshai, wan bad ïakynduh ïa nga, ba phin shai lut,” la ong u Bah Prestone.
Haba pynpaw ba ka VPP kam dei ban ïalam bakla ïa ki paidbah, u Bah Prestone u la ong, “Nga tharai katto ka la biang. Balei ba ki dang ïai kren kumtei, balei ba ki pyrshang ban ïalam bakla ïa u paidbah bad mynno ba ngi la ong ba ngi ai ïa ka jaka sha kita ki briew. Ïa kane ka jaka yn ai sha ka municipal bad ka municipal kan sa leh ïa kaba donkam haba ïadei bad ki nongtrei jong ka. Nga la ïohi ïa ka jingkren jong ki bad lada ngi aiti ïa kane ka mat sha ka VPP, kaei kaba kin leh haba kim tip ïa u ‘A’ u ‘B’ bad kim tip eiei ruh em, ki shu pyrshang beit tang ban ïalam bakla ïa ki paidbah”.
“Katto ka la biang, sangeh noh ka leh politik namar ki paidbah ki sngewthuh kham bha bad nga kyntu ïa kine ki nongïalam ba kim dei ban sngewthuh bakla bad ban nym ïalam bakla ïa ki paidbah ka Jylla,” la ong u Bah Prestone.
