Shillong, Nohprah 11
U Bah VGK Kynta uba dei uwei na ki Muktiar ba la paw hapoh ka Jylla u la ong ba ka Meghalaya Transfer of Land (Regulation) Act, 1971, kam lah satia ban treikam ha ki jaka jong ka Sorkar, lada ka Sorkar ka ai jaka ban shna ïa ki ïing na ka bynta ban pynkynriah ïa ki briew na Them Metor, Them Ïew Mawlong.
Lah ban kdew ba wat na ka liang u Symbud Myntri Rangbah ka jylla, u Bah Prestone Tynsong ha ka Lah Sngi U Blei u la pynshai ba ka jaka ban tei ïa ki ïing na ka bynta ban sah ki briew na Them Metor, kam dei kaba la ai duh sha kita ki briew, hynrei kan dei beit hapoh ka jingpeit ka ophis Shillong Municipal Board namar ka dei ka jaka jong ka SMB.
Ha kaba ïadei bad kane, na ka liang u Bah VGK Kynta haba kren bad u nongthoh khubor u la ong ba lada ka don ka jingïapynbeit hapdeng ki ar mamla (kata ka Sorkar bad ka Harijan Panchayat Committee), ka long kaba bha eh, namar hadien ba la mih ki jingdawa ban pynkynriah, bad kumba ka paw mynta ka Sorkar ka kwah ban pynkynriah ïa ki briew na Them Metor sha ki jaka bym hap hapoh ka Khyrnit Hynriew. Haba kylli, u la ong ba ka aiñ bat khyndew kan nym lah ban treikam eiei namar ka jaka ka dei jong ka Sorkar, namar ka Meghalaya Transfer of Land (Regulation) Act, kam treikam ha ki jaka Sorkar lane ki normal area jong ka Shillong.
Ha kawei pat ka liang u Bah Kynta u la ong ba lada ka don ka jingpynbeit da ka jingsuk ym lah ban khang bad kam donkam ban ap ïa ka jingsngew jongno jongno ruh, namar kam long kaba suk ban shu kyndang ïa ki briew kiba la sah kumba 150-200 snem ha katei ka jaka. Shuh shuh u la ong ba lada don ka jingkren kaba pynshongshit kaba ktah ïa ka jingmut jingpyrkhat jong ki paidbah tang ban ïoh myntoi politik dei ban tehlakam bad pyntreikam syndon da ka aiñ Meghalaya Preventive Detention Act.
