Shillong, Nohprah 11
Ka jingbym lah ha ki snem ba la leit noh ban buh la ka jong ka LPG Bottling Plant mynta kan sa urlong noh namar ka Sorkar MDA ka la shimkhia ban pynurlong noh ïa kane.
Kane ka jingshimkhia ka Sorkar ka dei hadien ba ka Jylla ka la ju mad jingeh khamtam haba don kano-kano ka jingïakhih ha Assam bad lada duna ka jingpynpoi ïa ka LPG sha Meghalaya.
Haba ïakren bad ki ophisar ka Sorkar Jylla kiba tip bha shaphang kane ka kam, ki la ong ba da ka jingshimkhia ka Sorkar ha kine ki khyndiat snem la lah ban ïoh jaka ban shna ïa ka LPG Bottling Plant bad ki kam ruh ki la sdang ban ïaid shaphrang.
Haba kylli halor ka jingbuh ïa ka jaka pynlang umphniang (oil depot), la ong ba ïa kane ka kam ruh dang ïaid ka jingïakren khamtam ban ïoh jaka.
La ïathuh ba kane ka mat khamtam ban don la ka jong ka LPG Bottling Plant bad Oil Depot ka dei kaba la sahteng la bun phew snem, bad dei mynta ba kane ka kam ka la nang ïaid shakhmat ha kane ka Sorkar kaba mynta.
Kumba shu kdew, ka Jylla Meghalaya ka ju mad jingeh ha ka liang ka LPG bad umphniang kali haba ki nongtrei ne nongñiah trok kit umphniang ki ïakhih ha Assam khamtam ban nym wanrah ïa kine ki mar kiba donkam eh man la ka sngi.
