Shillong, Nohprah:
Ka Child Friendly Shillong kaba dei kawei na ki shnat treikam jong ka Bosco Integrated Development Society (BITS) kaba peit bad khmih ïa ka jingbha jong ki khynnah ha nongbah ha ryngkat ka jingïatreilang bad ka Institute of Professional Studies (IIPS) bad ka Martin Luther Christian University (MLCU) ka la pynlong ïa ka jingpynsngewthuh paidbah halor ka jingwanrah ka jingshngaiñ bad ka jingïaid na ka bynta ki khynnah ha ki surok ki syngkieñ na ki jingjia aksiden.
Ïa katei ka jingpynsngewthuh paidbah la pynlong ha ka Lah Sngi U Blei ha shilynter ki surok naduh na Garikhana shaduh sha Laitumkhrah Don Bosco Square bad na Nongthymmai sha Don Bosco Square ha ryngkat ka jingai jinghikai ïa ki nongleit nongwan, ki nongñiah kali, ki khynnah halor kumno ban ïada ïa la ki khun ki kti na ki jingjia aksiden kali.
Haba kren sha ki lad pathai khubor, na ka liang uwei na ki dkhot ka Child Friendly Shillong, u la ong ba ka jingthmu ba la pynlong ïa katei ka prokram ka long ban ai ka jingshngaiñ khamtam ïa ki khyllung ki khynnah.
Utei u dkhot ka Child Friendly Shillong, u la ong ba ka mat ba kongsan bad kaba ym ju kdew satia ka dei ka jingshngaiñ ki lynti ki surok na ka bynta ki khynnah rit. U la ong ba hadien ka jingïamir jingmut lang hapoh ka kynhun, la shim ïa ka rai ba kaba donkam ka long ban pynsngewthuh paidbah halor kumno ban ïada ïa la ki khun ki kti na ki jingjia aksiden.
U la ong ba la ïohi ba kiba bun ki kmie ki kpa kiba ju wan on skul ïa ki khun, ïalade ki phong ka jingda khlieh lane ka ‘helmet’ katba ïa ki khun pat ki khlem pynphong satia bad kane ka buh jingma shikatdei eh bad ki paidbah kim tip satia ba ka aiñ ka don ha kaba ïadei bad kane.
“Ngi kwah ban pynsngewthuh ïa ki paidbah jong ngi, ngim ong ba kim nang ne kim tip ha kaba ïadei bad kane hynrei ngi kwah ban nang pynshai bad pynsngewthuh shuh shuh ïa ki ba ngi dei ban ai ka jingshngaiñ na ka bynta ki khun jong ngi ha ki surok”, la ong utei u dkhot.
U la khublei ruh ïa ka tnat pynïaid kali jong ki pulit ka East Khasi Hills kiba la ïasnohkti lang na ka bynta kane ka jingpynsngewthuh paidbah.
Shuh shuh u la ong ba watla kane ka dei ka sienjam kaba rit ba ki la sdang hynrei lada kane ka wanrah ïa u soh babha, kumta na ka liang ka kynhun kan sa pynlong ïa kane ka jingpynsngewthuh paidbah man la u snem.
“Ngi kwah ban pyntikna ba ka surok kan long kaba shngaiñ ïa kiba la heh la san bad kaba kham kongsan eh na ka bynta ki khyllung khynnah”, la ong utei u dkhot.
U la kyntu ruh ïa ki paidbah ba kin long kiba peitngor ïa ki surok bad ba kin bud thik-pa-thik ïa ki kyndon jong ka rukom ñiah kali bad thuk-thuk khnang ba ka surok kan long kaba don jingshngaiñ na ka bynta baroh.
