Jaipur, Nohprah 12
Sa shisien pat, ka seng BJP ka la pynlyngngoh ngaiñ ïa kiba bun ba lang da kaba sei da u MLA ba dang shu jop tang shisien ban long kum u Myntri Rangbah ka jylla kaba heh bad ïar.
Ha kane ka kynti, ka BJP ka la sei da u Bhajanlal Sharma, uba dei u MLA ka Sanganer bad uba dang jop tang shisien ban long kum u Myntri Rangbah ka Rajasthan. Ka jingpynbam smai ïa u kum u Myntri Rangbah ka lah ban long ha ka 15 tarik Nohprah kaba dei ruh ka sngi kha jong u.
Une u Myntri Rangbah bathymmai ka Rajasthan, uba la don 56 snem ka rta, u dei u Brahmin bad kin don arngut ki Symbud Myntri Rangbah, kata, ka Diya Kumari, kaba la ju long teng ka MP, bad u Pren Chand Bairwa.
Ka jingshah jied jong u Sharma ka la pynduh lad noh ïa ka Myntri Rangbah barim bad nongïalam ba radbah ka seng, ka Vasundhara Raje, ba kan ïoh biang ban shong ha kane ka shuki watla ha ka ilekshon kaba dang shu dep, ka la jop.
U Sharma u la don bynta shwa bad ka seng ki samla pule, ka ABVP, kaba don jingïadei bad ka RSS, bad u la ju bat ruh ïa ka kam General Secretary ka BJP ha Rajasthan.
Ka jingjied jong ka BJP da u Sharma ka ïasyriem bad ka jingjied Myntri Rangbah ha ki artylli kiwei pat ki jylla, ka Madhya Pradesh bad Chhattisgarh.
Ha baroh kine ki lai tylli ki jylla, ka BJP kam shym la ailad shuh ïa ki nongïalam barim kum u Shivraj Singh Chauhan ha Madhya Pradesh, u Raman Singh ha Chhattisgarh bad ka Raje ha Rajasthan.
Ha jylla Madhya Pradesh, la pynlong Myntri Rangbah ïa u Mohan Yadav uba la long MLA la lai sien bad Myntri sorkar barim katba ha Chhattisgarh, la jied da u riewlum, u Vishnu Deo Sai.
