Nongstoiñ, Nohprah 12
Ki pulit jong ka West Khasi Hills ha ryngkat ka kynhun tohkit na nongbah Shillong ba kynthup ïa ki pulit ka Crime Scene Unit lem bad ka K-9 Unit Dog Squad, ha ka Sngi Ba-Ar ki la hiar sha ka shnong Mynniar ban pynlong ïa ka jingbuddien bad tohkit shuh shuh halor ka jingjia shah shoh bad shah lute ki nonghikai ha ka janmiet jong ka 11 tarik mynta u bnai.
Katkum ka tyllong khubor la ong ba ha katei ka jinghiar jong ki pulit sha katei ka jaka, la pynkit noh ruh ïa ka met ba sah jong u T.R. Sangma, u nonghikai jong ka skul Rangsapara Secondary School, uba la khlad noh ha katei ka jaka hadien ka jingmynsaw kaba jur na ka jingshah shoh shah tied dusmon ha ki runar.
Shuh shuh la sakhi ruh ba na katei ka jaka kaba jia, ki pulit ki la lap ïa ka thuk-thuk jong ki nonghikai kaba la kyllon harud surok.
Halor kane ka jingjia, na ka liang u SP ka West Khasi Hills, u la ong ba ka jingthwet ïa kitei ki runar haduh mynta ka dang ïaid shakhmat.
Kum ban shu pynkynmaw, ha ka janmiet jong ka 11 tarik Nohprah, ar ngut ki nonghikai jong ka Rangsapara Secondary School ki la shah shoh dusmon ha ki runar ki bym pat lah satia ban tip ki dei kiei ha kawei na ki jaka ha ka shnong Mynniar.
Kitei ar ngut ki nonghikai kiba la shah shoh dusmon ki dei ba la tip kyrteng kum u S. Chetri (49) bad u T.R. Sangma (48). La ong ba kitei nonghikai ki dang wan na Nongstoiñ da ka thuk-thuk da ka jingthmu ban leit sha Rangsapara. Ynda ki la poi ha Mynniar ki runar bym lah ithuh ki la pynsangeh ïa ka thuk-thuk jong ki bad tied naphang ïa kitei ki nonghikai.
La ong ruh ba ha kane ka jingjia baroh ar ngut ki la mynsaw jur bad ïa u S. Chetri la pynkit noh mar-mar sha Civil Hospital Nongstoiñ ban ïoh ïa ki lad jingsumar ba kyrkieh katba u T.R. Sangma u la khlad noh na ka jingjur palat ka jingmynsaw.
