Shillong, Nohprah 12
Ka jingbret pathar ki briew ïa ki synrum bad ki jaboh jabaiñ bad ka jingpynjaboh ïa ki um ki wah ka dei ka mat kaba ki shnong ki thaw bad ki nongshong shnong ki hap ban shimkhia nangne shakhmat lym kumta ka jingeh kan long ïa ki pateng ban sa wan.
Kane ka jingkren sngewkhia ka la sawa mynta ka sngi ka sngi ka 12 tarik Nohprah 2023 na ki ‘riew rangbah ha jingïalang ba aiti ïa ka kali kit synrum sha ka Dorbar Hima Khyrim Syiemship ha Smit ha kaba la aiti da u Chief Executive Member ka Khasi Hills Autonomous District Council u Bah Pynïaid Sing Syiem lem bad ki Executive Member kiba kynthup ïa u Bah Carness Sohshang bad Bah Fantin Joseph Lakadong, u Syiem ka Hima Khyrim u Paiem Dr Balajied Sing Syiem nalor ki bakhraw batri, Lyngdoh bad nongkitkam jong ka Dorbar Shnong Smit bad ki Dorbar Shnong ba marjan.
Ha kane ka sngi ka KHADC ka la pyllait bad aiti ïa ka trok kit synrum ka ban sa pyndonkam da ka Hima Khyrim khamtam ban kit ïa ki synrum kiba mih na ïew Smit.
Ha jingkren jong ki ‘riew rangbah kynthup ïa u CEM Bah Pynïaid Sing Syiem ki la pynpaw ka jingsngewkhia halor ka jingjaboh ka mariang bad ki sawdong sawkun bad kane ka dei ka jingeh kaba man la ki shnong ki mad bad hap ban shim ki lad ki lynti kumno ban tehlakam ïa ka jingbret pathar ïa ki synrum bad jaboh jabaiñ ha ki jaka ïew kum ha Smit kaba dei kawei na ki ïew kaba heh tam ha Khasi.
U la kdew ruh ba ka jingbret pathar ïa ki synrum kaba pynjaboh ïa ki sawdong sawkun bad ka jingjaboh ki um ki wah kan long ka mat kaba khia bha ïa ki shnong ki thaw.
U Bah Pynïaid nalor ka jingbatai jong u shaphang ka jingpyntreikam ïa ka aiñ Solid Waste Management lyngba ka KHADC u la kren shaphang ka bor ban daiñ kuna da ki bor shnong ïa kino kino kiba bret pathar ïa ki synrum bad ki jaboh jabaiñ.
Na ka liang u CEM u la pynsngew ruh sha ka Hima bad Dorbar Shnong Smit halor ka jingdonkam ban ïoh ïa ka jaka ban buh ïa ka Resource Recovery Centre ka ban long ka jingmyntoi ïa ka shnong ka thaw namar lyngba kane ka Centre yn lum ïa ki synrum bad pynkhuid ïa ki.
U la ong lada lah ban pynïoh jaka yn sa wanrah ïa kane ka projek kaba ym duna ïa ka 50 lak tyngka.
La ïoh ruh ka jingkren na ki Executive Member, Paiem Balajied bad u Sordar ka shnong Smit.
U Bah Carness u la ong ba la 20 tylli ki trok kit synrum ka KHADC ka la pyllait sha ki Hima bad ki ïew kiba kham heh.
U ai ka jingïaroh ïa u CEM kum u nongïalam uba lah ban trei bad peit jngai ïa kiei kiei ha ka rukom treikam jong ka Executive Committee.
U Executive Member Bah Fantin Joseph Lakadong u la ong ba ka jingshah kynthoh ba ki Executive Member ki khih khohreh ban trei tang hashwa ka ilekshon ka long kaei kaei kaba bakla bad u la bynrap ba lada leh bha katno katno ruh ki jingkynthoh ki don beit.
U Bah Lakadong u la pynpaw ïa kane haba kren ha ka jingïalang pyllait trok kit synrum ha Smit ha kaba u la kren shaphang ka jingtrei kam ka Executive Committee ka KHADC hapoh ka jingïalam u Bah Pynïaid Sing Syiem kum u CEM.
Haba pynphai nia ïa kito kiba kynthoh ba ki EM ki khih khohreh hashwa ka ilekshon, u Bah Lakadong u la ong, baroh shikatta haba shong ben kumno yn ïoh thep kol haba khlem pat mih sha madan. Hynrei mynta haba la ïoh ban mih madan la ïoh ban leh ïa kaei kaba donkam.
Halor ka jingkhynra laisen khaïi ka KHADC, u la ong ruh ba ki don kiba kren ïa kane hynrei u la ong mynshwa haba ym don ha ka bor kumno yn leit ban khynra bad mynta haba don ha ka bor un leit beit ban khynra.
U la ong ruh ba lada leh bha katno katno ruh ki jingkynthoh ki don beit, tangba ym dei ban leh politk hynrei leh ïa kaba donkam.
U la ong ruh ba lada ngi ïaid pynheh shadem katno katno ruh hangne, ha kaba khatduh hap ban leit sha Delhi ban pan ïa ka jingdonkam ki jong ngi, namar ka eh ïa ngi ban pyndap.
U Bah Lakadong u la pynpaw ka jingsngewnguh ïa u CEM uba la trei shitom ban wanrah shibun kiei kiei na ka bynta ka Council. Kumta u la don ba donkam ban pynduna ïa ka jingkynthoh hynrei donkam ban ïatreilang, namar lada bun kiba kynthoh ngi duh shibun ki jingmyntoi.
