Shillong, Jylliew 18
U Chief Executive Member (CEM) barim ka Khasi Hills Autonomous District Council (KHADC) u Bah Shem-borlang Rynjah u la pynkynmaw ba u don uwei u bar jylla uba ai seminar ha kawei ka jingïalang u la ong lada ki MDC ki dang lapmiet ban sam skhim yn nym lah ban pynkhlaiñ ïa ka District Council.
Kane ka jingpynpaw u Bah Shemborlang ka dei haba shimbynta ïa ka mat jingïakren ba la wanrah da u MDC na Laban Bah Ricky Shullai halor ka jingtreikam ka Sixth Schedule.
U Bah Shemborlang u la pynkynmaw haba u la shimti ïa ka shuki CEM u la kylli naei la ïoh ïa ka 15th Finance Commission, ki ophisar ki la ïathuh ba ki la ïoh na ka Ministry of Panchayati Raj, “Nga la kylli biang te ïa ka 16th Finance Commission, ki la jubab ba la dep phah ruh ïa ka jingtyrwa da ka EC kaba rim bad hangne nga la ong ba kan long kaba mynsaw”.
U la ong biang ba ki Khasi ki don tang kawei ka khyndew lada shah beh kin nym don jaka shuh hynrei kiwei ki jaidbynriew lada ki shah beh ki dang lah ban leitphai sha ki jaka jong ki, kumta u la ai jingmut ïa ka ïingdorbar ba dei ban thaw ïa ka Expert Committee ban ïakhun ban ïoh biang wat ïa ki jaka kiba hap ha European ward ruh.
U MDC shimet ka Laban Mawprem Bah Ricky Shullai u la ong ba ka jingdon ka Sixth Schedule ka long ban ïada ïa ka jaidbynriew ym ban leit wad skhim namar u la sngewsih namar ki don saw tylli ki konstitwensi ha sor Shillong bad la pynïaid ïa ki skhim lyngba ka Municipal.
U Bah Ricky u la ther tyngeh ïa ka Executive Committee jong ka KHADC ba la ïalam da ka VPP namar kim shym la leit ïakhun mukotduma pyrshah ïa ka Sorkar namar ha u snem 2025 kaba la pynïaid ïa ki skhim jong ki MDC lyngba ka Municipal namar ïa kane ka skhim la wan lyngba ka Ministry jong ka Panchayati Raj.
U la pynpaw ba u don ka jingsheptieng ba ïa ki skhim la pynïaid da ka municipal bad kan sa poi ban sa duh bor wat ki rangbah shnong bad shaduh ki Hima.
Ha kawei na ki kynta kylli jingkylli, u Executive Member ba dei peit ïa ka tnad kam pynroi ha Khasi Hills Autonomous District Council u Bah Powell Sohkhlet u la pynpaw ka jingsngew ïoh mynsiem ïa ka jingtyrwa ka Kong Grace Mary Kharpuri ka MDC NPP na Nongshken ba kin leit lang ban ïakynduh ïa ki nongïalam jong ka Sorkar Jylla namar ïoh kim sngap lada leit tang ki MDC ka VPP.
Kane ka jingpynpaw u Bah Powell ka dei haba jubab ïa ka jingkylli bynrap da ka Kong Grace halor ka jingbym pat pyllait ka Sorkar Jylla ïa ka pisa sha ka KHADC kaba la phah na ka Sorkar India.
U Bah S Rashir u MDC na Mawshynrut u la ong ba lano yn pyllait ïa ka pisa lyngba ka 15th Finance Commission Tied grant bad untied grant 2022-2023, u Bah Powel u la ong ba ka shong ha ka jingmynjur jong ka Ministry of Panchayati Raj.
U Bah Powell u la ïathuh ba ka jingbym pyllait ka Sorkar India ïa ka skhim jong u snem 2023 namar ym shym la leh online ha ka jingpyllait pisa kaba nyngkong jong u snem 2021-22 hynrei da ka jingtrei shitom ki ophisar bad ka jingïarap ka Sorkar Jylla, ki la lah ban pyndep ha u bnai Kyllalyngkot, 2026 bad dei ha ka 19 tarik Rymphang, 2026 ba ka Sorkar Pdeng ka la pyllait ïa ka pisa kaba ar sien kaba mut ka la pynsuk nangne shakhmat ban pan skhim na bynta ka 16th Finance Commission.
U la pyntip ruh ba ka Sorkar Jylla ha ka 5 tarik Jymmang, 2026 ka la ai ïa ka shithi ba la mang pisa kaba 12 klur 15 lak tyngka sha ka KHADC hynrei haduh mynta ka Sorkar Jylla ka khlem pat phah sha ka Council.
