Shillong, Jylliew 18
U Symbud Myntri Rangbah ka Jylla, Bah Prestone Tynsong haba kren halor ka jingmih ka kynhun ban dawa na ka Sorkar ban pyntrei biang ïa u dewïong kumba ju long mynshuwa, u la ong kane kam lah ban long ban shu thoh shithi bad pynkylla ïa ka aiñ.
U la ong ba yn hap ban sngewthuh ba kine ki dei ki aiñ jong ka Sorkar Pdeng, bad halor ka jingkylli ba balei ïa ka Mines and Minerals (Development and Regu-lation) Act, 1957 (MMDR Act) la pyntreikam ha Mehalaya namar ka hap hapoh ka Khynit kaba 6, u la pynsngew ba kane ka dei ka khubor kaba ïalam bakla.
U la ong ruh ba lada ka dei ka aiñ jong ka Jylla ne ka ‘State Law’, kata lah ban leh eiei hynrei naba ka dei ka aiñ ka Sorkar Pdeng, ka don ka rukom treikam ha kaba yn hap ban ïaid bad ban kynjoh sha ka Sorkar Pdeng la ka long ne em kaba lah ban wanrah jingkylla.
U la ong ruh ba ka long kaba bakla ban ong ba ka Sorkar kam shim ka jingkitkhlieh, hynrei ka Sorkar la shimkhia ïa kane ka kam.
Haba ïadei bad ka jingtih dewïong katkum ka juk stad saian, u Bah Prestone u la ong ba ïa ki laisen la dep ban ai, bad pynshai da kaba ong ba haba ki ai ïa ka laisen kam dei ka kamram jong ka Sorkar ban pyntreikam ïa kane, hynrei dei ki kynhun shimet kiba hap ban leh ïa kane bad ym lah ban kynnoh ïa ka Sorkar.
Shuh shuh u la bynrap ba ha ka 22 tarik kin leh ïa ka jingbatai bniah na ka kynhun ki ‘riew shemphang ha kaba kin pule bniah la ka lah ne em ban pynkylla ïa ka Mines and Minerals (Development and Regulation) Act, 1957 (MMDR Act).
