Shillong, Jylliew 18
Ka Director General of Police (DGP) ka Jylla, Kong Idashisha Nongrang ha ka Sngi Palei ka la ong ba ka tnad ka la khmih bniah ïa ki buit treikam jong ka kiba hashuwa halor ki kam thombor pyrshah ïa ki kynthei bad mynta ka dang pynbit pynbiang ïa ka rukom treikam jong ka hadien ba ki jingïalap kiba mynshuwa ki la pulom ban wanrah ïa ka jingangnud kaba kwah.
Ka Kong Nongrang ka la ïathuh sha ki nongthoh khubor ba ka ‘Internal Audit’ ka la pyni ïa ki jingduna ha ki jingmih watla ki la don katto-katne ki jingpynsngewthuh paidbah. Kum ka jubab ïa kane, ki pulit ki la sdang ban ïatreilang bad ki nongtrei ASHA ha ki hynriew tylli ki distrik kiba ha ka thaiñ Mihngi bad Sepngi jong ka Jylla.
Ka la pyni ba ki ASHA ki lah ban ngam kham jylliew sha ki shnong ki thaw bad bunsien ki shakri kum ki nongïarap banyngkong haba ïadei bad ki kynthei, kaba pynlong pat ïa ki kum ki paralok ba kongsan na ka bynta ka jingïasam jingtip kaba sted bad ka jingtuklar kaba kloi.
Ka DGP ka la pynpaw ruh ïa ki jingkylla ha ki ‘Women Help Desk’ jong ki pulit ban pynlong ïa ki ban don ka jingïadei kaba ïajan bad ki lanot. Ha kane ka rukom treikam kaba thymmai, ki kynthei ki lah ban ‘phone’ sha u ‘Helpline’ ha ka jaka ban wan sha thanad, bad ki kynhun pulit kin leit ban lum ïa ki FIR ha ka jaka ba ki don.
Halor ki mukotduma POCSO, ka Kong Nongrang ka la pynpaw ïa ki jingeh ha ka rukom treikam kynthup ïa ki jingpynslem ha ki kaiphod DNA bad FSL kiba pynthut pat ïa ka jingbud ryntih ïa ka por pynngat ‘Chargesheet’ kaba 90 sngi.
Ka la kdew ruh ïa ka jingbym ïatreilang jong ki lanot ha ka por ba ïaid ka jingbishar kum ka jingkhanglad kaba na ka por sha ka por.
“Ngi leh katba lah ban pynngat jingmudui, hynrei haba ka lanot hi ka ïaleh pyrshah ha ka por ba ïaid ka jingbishar, ka kylla long pat kaba eh,” ka la ong.
Ha kaba ïadei bad ki khubor ba la pyndam noh ïa ki mukotduma POCSO da ki Ïingbishar, ka DGP ka la ong ba kam don kawei ka daw kaba la kdew ha ki rai bad kam don ïa ki jingkheiñ kiba tikna, hynrei ki hukum pyndam ki la wan na ki bynta bapher-bapher.
