Shillong, Jylliew 18
U Chief Executive Mem-ber (CEM) ka Khasi Hills Autonomous Dis-trict Council (KHADC) Bah Winston Tony Lyng-doh u la pynpaw ka jingsngew pangmet ban ïohi ba ki jingtei ba bun ki la sdang jot hynrei ym shym pat lah ban pyntreikam ïa ka jaka sumar Khasi kaba la tip kum ka Mynnor kaba la peit da ka Khasi Traditional Medicine Institute (KTMI) kaba don ha u Lumsoh-petbneng, Ribhoi District.
Haba jubab ïa ka jingkylli ba la wanrah da u Bah Ricky Shullai, u MDC na Laban Maw-prem, u Bah Winston u la ïathuh ba ka KHADC ka la pynlut haduh 9.47 klur tyngka hynrei haduh mynta kam pat treikam eiei.
U la pyntip ba ha ka 26 tarik Naitung, 2024 ka la don ka jingïasoi sop-sop khlem da tip ki dkhot ka KTMI ïa ka jingïasoi bad ka Centre of Learning, Knowledge and Services ha ka dor hynriew lak tyngka ha ka shisnem hynrei haduh mynta haba la ïaid ar snem kim pat siew ka bai shim wai.
U la ïathuh haba u la leit ban jurip ïa kane ka jaka sumar dawai tynrai Khasi, u la lap ba kane ka jingtei ka la kylla ïingjah hynrei ym shym la ïohi ruh ïa kane ka Centre ba kan buh ophis ruh.
“Kaba pynpangmet ïa nga namar nga la ïohi ba ki don ki kamra kiba la jot la pra bad nga tieng ïoh long kum ha Jingkieng Kalong ka ban sa wanrah ka jingduhnong”.
U la ïathuh haba u la poi sha ophis haba u la pan ïa ki kot ki sla, u lap ba kane ka centre kam pat siew wat tang shi tyngka sha ka ophis, hynrei haba la phah haduh san tylli ki shithi kim shym la wan siew ïa ka pisa.
U la pyntip ruh haba u la khot ïa u trai jong kane ka Centre Bah SJ Byrsat, u la kyrpad lada um lah ban pyntreikam u dei ban aiti noh sha ka KHADC bad u la pan por hynrei haduh mynta um shym la ïoh jingtip shuh.
Ha kajuh ka por u la pynpaw ka jingsngew lyngngoh namar ki dkhot ka KTMI kim don jingtip eiei ïa ka jingaiti sha kane ka centre kaba la sah tang ha ka umdum, kane ka pyni ba la don uwei ne ar ngut kiba la ïasoi sop sop.
