Aizawl, Nohprah 12 (UNI)
U Myntri bathymmai ka tnat Korbar Jylla ka Mizoram, u K Sapdanga, u la ong ba ka thong jong ka sorkar ka long ban ïakhun pyrshah ïa ka jingjyllei ka kam khaïi drok.
“Ka sorkar Mizoram kan leh da kaba tyngeh ban pynduna ïa ki kam runar bad ban pynduh jait ïa ka jingkhaïi drok ha jylla kaba la jyllei ha ki khyndiat snem,” la ong u Sapdanga hadien ba u la shimti ïa ka shuki.
U Myntri u la ban jur ïa ka jingdonkam na ka liang ki pulit ban pynthymmai ïa ki rukom treikam khnang ban lah ban ïakhun pyrshah ïa ki runar kiba bun buit.
“Ngam shong ha kane ka shuki ba ngan shu hukum kat ïa ba don. Nga don hangne ban ïatreilang bad baroh khnang ba ngin lah ban pynkut ïa ka jingjyllei u drok,” la ong u Myntri da kaba bynrap ba ka long kaba donkam ban ïatreilang khnang ba yn lah ban wanrah ïa ki jingkylla bad ba ka Mizoram kan kham long shngaiñ na ka bynta ki pateng ban wan.
