Shillong, Nohprah 12
U MLA ka Voice of the People Party (VPP) na North-Shillong, Bah Adelbert Nongrum ha ka Sngi Ba-ar u la kynthoh ïa u Symbud Myntri Rangbah ka Jylla, Bah Prestone Tynsong halor ka jingkren ba ïadei bad ka Them Ïew Mawlong bad ong ba ka VPP da lei-lei kan ym ïalam bakla ïa u paidbah.
Halor ka jingkynthoh u Symbud Myntri Rangbah ba ki nongïalam ka VPP ki ïalam bakla bad leh politik ïa ka mat halor ka Them Ïew Mawlong, u MLA u la ong, “Nga kwah ban pynkynmaw ba ka VPP lano-lano ruh kan ym ïalam bakla ïa u paidbah bad ka jingkha ïa ka VPP kam dei tang na bynta ka saiñ pyrthei hynrei namar ka mat treikam.”
“Ka jaka ka dei ka jingim, namarkata ka daw kane ka dei ka jingim bad jingïap na bynta ka lawei jong ki longdien ki pateng,” u la ong.
Kumjuh, halor ka jingong u Symbud Myntri Rangbah, uba long ruh u Chairman ka HLC ba um don por, u Bah Nongrum u la buh jingkylli ba lada u Symbud Myntri Rangbah um don por, mano pat ban shim ïa kata ka por jong u.
“Ki sengbhalang ki ong ban sa pan RTI, nga ruh ngan ïai buddien ïa kane ka kam la ka dei ha madan ne ïingdorbar thawaiñ…kam mut ba nga sngewpher jaidbynriew, ne nga shun ne isih ïa kiwei pat ki para nongshong shnong, hynrei nga isynei namar ka rukom im jong ki ka long kaba i-sangsot,” u la ong.
Ha kajuh ka por, u la pynsngew ba ka dei ka kamram jong u kum u kpa jong ka konstitwensi ban ïakhun na bynta ki nongshong shnong ha katei ka jaka (Them Ïew Mawlong) halor ka longbriew-manbriew da kaba ban jur ban pynkynriah noh ïa ki na katei ka jaka namar ka don ka jingma ha ka liang ka koit ka khiah nalor ka jingkhapngiah kaba shyrkhei.
“Ka jingkylli ka long balei phin hap ban da ai kyrpang kata ka jaka, ïa ki nongtrei ka Municipal, phi la rah sha jaka sah ka Municipal…hooid, phi la leh ïa kaba dei eh. Balei phim phah pat ïa kine kiwei lane ban pynkynriah ïa ki sha la ki jong ki ‘Quarter’ jong ki tnad treikam…la lait ban ai kata ka 1.4 akar,” la buh jingkylli u Bah Nongrum.
Ha kawei pat ka liang, haba ïadei bad ka jingkren jong uwei u muktiar ka Jylla halor ka Meghalaya Transfer of Land (Regulation) Act, 1971, utei u nongmihkhmat u la ong, “Ym da donkam ban hikai skul, ngi tip bha kaei ka Land Transfer Act, haei ka treikam bad haei kam treikam, hynrei kam mut pat ba ki kyntien jong phi kin pynshlur ïa ka Sorkar ba dei tang ka Non-Schedule Area, ba dei ka European Ward…ban leh katba mon.”
Shuh shuh u la bynrap ba ka Sorkar ka dei jong u paidbah bad kam lah ban leh katba ka mon.
Kumjuh halor ka Meghalaya Preventive Detention Act kumba la pynpaw da u muktiar, u la ong, “Phi tip bha, ngi tip bha kaei ka MPDA, kumno ka dei ban treikam bad ha kaba kum kiei ngin pyntreikam.”
