Shillong, Nohprah 12
Ka Organising Committee jong ka KSU Mawlai Circle ha ka Sngi Ba-ar ka la pynlong ïa ka jingkhynra ïa ki mynder kiba wan bylla ha ki bynta bapher-bapher jong ka shnong Mawlai.
Ha katei ka jingkhynra, na ka liang ka seng na ki thaiñ Mawïong, Nongkwar bad Ïewrynghep ka la lap ïa shibun ki mynder kiba wan ban trei ïa ki kam ñiad rong, tah ’tiles’ bad kiwei ki kam trei misteri ki bym biang bad bym don kino-kino ki kot ki sla khamtam ka ‘work permit’.
“Ka seng hadien ba ka la lap ïa ki mynder bym don ki kot ki sla ba biang ka la pynher krad lut bad pynphai sha ka jaka kaba ki wan bad ka la maham tyngeh ba kim bit ban dang wan trei wan ktah hapoh ka shnong Mawlai bad ha Ri-Khasi hi baroh kawei,” la ong ka kyrwoh na u Assistant General Secretary ka KSU Mawlai Circle, samla Macdonald Jitem.
Na ka liang ka KSU Mawlai Circle ka kyntu ïa baroh ki trai ïing, kontraktor bad sha baroh ki para-ri ba ki dei ban kiar na ka aikam aijam ïa ki mynder namar kane kan nang pynkharoi shuh-shuh ïa ki mynder.
Ka seng ka la ong ruh ba kane kan buh jingma ïa ka ri bad ka Jaidbynriew baroh kawei, namar lada ki mynder ki wan shane bad lada kim ïoh ki kam ki jam ba kin im bad kamai jakpoh, kin ym lah ban shong ban sah hangne.
“Ka seng ka ïawer ïa baroh ki para-ri ban sangeh noh ban ai kam ïa ki briew ba nabar bad ban sdang ai kam para Khasi kum shi bynta ba ngin ïaleh pyrshah bad ïada ïa ka jingsdang ban wan buhai shnong ki mynder ri hapoh ka ri baieid jong ngi,” la ong shuh ka kyrwoh na u samla Jitem.
