Shillong, Nohprah 12
Ka Khun Kynthei ka Bri Hynñiewtrep (KKKBH) ka la kyntu ïa ka Khasi Hills Autonomous District Council (KHADC) ba ki dei ban phah khang shwa ïa ki dukan bar jylla ki bym don laisen khaïi ha Ïewduh.
Kane ka jingkyntu kane ka seng ka dei namar hadien ba u CEM ka KHADC Bah Pynïaid Sing Syiem u la pynpaw ba ki don hapoh arhajar tylli ki dukan bar jylla ha Ïewduh bad na kine ki dukan ki bun ki bym don laisen khaïi (trading license) na KHADC.
Haba ïakren bad ka General Secretary ka KKKBH, Kong S. Marweiñ ha ka jingïadonlang ki nongkitkam kiba dei ki nongshong dukan ha Ïewduh ka la kyntu ïa ki bar jylla ki bym don laisen khaïi ki dei ban sangeh shwa ban shong dukan namar kane kan ktah bad pynkhapngiah ïa ka Ïewduh.
Nalor nangta ka la kyntu ïa ka KHADC ba dei ban wad jingtip ïa kita ki dukan bym don laisen ban phah khang shisyndon.
“Ngi la ujor sha u CEM ka KHADC ba kum ki longkmie kiba hap kit ïa ka khia ka shon ha ïing ha sem namar lada ngi ki Khasi ngi buh jhur ha jaka die madan ngi la shah beh katba u bar jylla u sei ki tiar shabar” ka la ong.
Ka Kong Marweiñ ka la ïathuh ba ka seng kan kyrshan beit ïa ka jingkhynra laisen ka KHADC ïa ki dukan bar jylla khnang ba kiba wan thymmai kin nym mih shuh ki dukan thymmai jong ki bar jylla.
Ka la ïathuh ba ha Ïewduh ki Khasi ki duna kiba shong dukan namar ki bun ki bar jylla namar ki Khasi ki bun kiba shong die madan. Dei na kata kadaw ki sngew kum ki poiwir lada ïakren ïa ka kam khaïi ha Ïewduh.
Nalor kata, ka la ïathuh biang ba ki Khasi kim lah ban siew lypa ka bai dukan haduh san lak tyngka namar lada siew ïa kata kim don shuh ban thied sa ïa ki mar ki mata, na kata ka daw ki bun kiba shong die madan.
