Tura, Nohprah 12
Ka Garo Hills Youth Organization (GHYO) ka la ujor ha u Deputy Commissioner ka West Garo Hills halor ka jingkynnoh pyndonkam pisa bakla haba ïadei bad ka Jal Jeevan Mission (JJM) katkum ka jingkheiñ, kaiphod kiba don ha ka JJM ‘Portal’.
Katei ka jingujor ba la aiti ha ka Lah Sngi U Blei ka dei halor ka kam JJM (Augmentation of Nekikona Combined WSS & Construction of Babilgre WSS) ba la pyntrei ha ka shnong Asikandi ha kaba ym shym la sakhi ïa kino-kino ki kor um kiba la pyndait ne ‘pipe’ um kiba la pynbiang.
Na ka liang ka seng, ki kaiphod kiba don ha ka JJM ‘Portal’ ki kdew ba ka jingpyntreikam ïa ka projek ha ka shnong Asikandi ka la long kaba jop. Hynrei, ka la kam ba ym shym la sakhi wat tang kawei ruh ka kor um ne ‘pipe’ um ba la pyndait ne pynïasoh ha ka shnong Asikandi ne kiwei-kiwei ki shnong hapoh kitei ki 2 tylli ki projek. Ka seng ka la kam ruh ba lait na ka top um kaba la pynïeng lypa ha kawei ka skul, ym shym la sakhi ïa kano-kano ka lad pynïasoh um sha ka.
“Halor ka JJM ‘Portal’, ka jinglong-jingman haba ïadei bad ka jingdon jong ka um-bam um-dih lyngba ka jingpynïasoh kor um kumjuh ka um kaba mih ha ki jaka leit bar la pruid dak ‘Yes’. Kane ka kdew shai ba ka don ka jingbakla naba kam shym la don kano-kano ka jingpyntreikam,” la ong u President, Nazmul Hasan.
Kaba lyngngoh ka long ba ka JJM ‘Portal’ katkum ka ‘Hasan’, ka kdew ruh ba katto-katne ka pisa ha ka kyrteng jong ka JJM (water supply) kaba la pynbiang sha ki longïing ka shnong Asikandi lem bad kiwei-kiwei ki shnong la dep ban sei.
Shuh shuh haba kdew ba ka lah ban don ka jingpyndonkam pisa bakla haba ïadei bad kitei ki 2 tylli ki projek, ka seng ka la dawa da ka jingtohkit kaba kloi ban shai lut kdar.
Ka seng ka la dawa pynshitom ruh da kaba tyngeh pyrshah ïa ki ophisar kumjuh u kontraktor ba dei khmih lada lap ba ki donkti ha ka ban pyndonkam bakla ïa ka pisa.
