Shillong, Nohprah 12
Ka Seng Kynthei Jaïaw Langsning ha ka 12 tarik mynta u Nohprah ka la pynhap pyrda noh ïa ka jingrakhe dap 50 snem lane ka Jubilee ksiar jong ka seng ha ka jingïalang kaba la pynlong habar jong ka Community Hall ka Jaïaw Langsning.
Ha kane ka jingrakhe la wan ban ïadonlang da u Myntri ba dei peit ïa ka tnad Social Welfare, u Bah Paul Lyngdoh uba la long ruh kum u kongsan ha ryngkat ka jingïadonlang u MLA ka Mawkynrew bad uba dei ruh u nongshong shnong barim jong ka Jaïaw Langsning, u Bah Banteidor Lyngdoh bad ka Kong B Kostimai Jyrwa kiba la long kum ki symbud kongsan, ki nongïalam ba hakhmat jong ka Seng Kynthei, ki ‘riew rangbah jong ka shnong, ki khynnah samla bad kiwei kiwei.
Ha kane ka sngi la ïoh ruh ban pule ïa ka kaiphod jong ka Seng Kynthei bad ruh na ka liang u kongsan, u Bah Paul Lyngdoh u ba la pyllait paidbah ruh ïa ka ‘Souvenir’ jong ka Seng Kynthei.
La sam ruh ïa ki khusnam sha ki nongjop ha ki jingïakob bapher bapher ba la pynlong ha baroh shisnem da ka Seng Kynthei bad ruh na ka liang u kongsan u la pynhap syndon ïa ka lama kum ka jingpynbna ba la pynkut ïa ka lehkmen Jubili Ksiar jong ka Seng Kynthei jong ka shnong Jaïaw Langsning.
La pynshongshit ïa kane ka sngi lyngba ka skit kaba la ïashimbynta da ki dkhot jong ka Seng Kynthei ha ryngkat ki jingrwai pynbyrngia na ka samla Bahunshisha Marweiñ.
Na ka liang u Bah Banteidor Lyngdoh u la pynpaw ka jingsngewkmen kaba khraw ban ïohi ba ka shnong Jaïaw Langsning katba dang ïaid ki snem, ka la lah ban kiew ha kiba bun ki liang.
“Ka Shnong Jaïaw Langsning ka dei ka nongmuna na ka bynta kiwei pat ki shnong kiba marjan bad na ka bynta kiwei pat ki shnong kiba don hapoh ka Ri Khasi baieid ka jong ngi”, la ong u Bah Banteidor.
Na ka liang u Bah Paul Lyngdoh, u la ong ba ki nongïalam jong ka shnong ki la lah ban saiñdur ba ka Jaïaw Langsning ka long ka nongïalam bad ka nongmuna.
“Ka dei ka shnong kaba rit kaba don tang hynñiew tylli ki block hynrei ka shnong kaba khraw ha ka jingïohi jngai, ngim donkam tang ïa ka jingheh khlem ka jingïohi jngai”, la ong u Bah Paul.
Shuh shuh u Bah Paul u la ong ba ki don shibun ki shnong kiba heh bad kiba bun paid kiba bun tnum ïing hynrei kam don ka jingïadei, ka jingïalum ïalang bad ka jingïatei kumba long ka motto jong ki Seng Kynthei Jaïaw Langsning.
Ha katei ka sngi, na ka liang jong u Bah Paul bad u Bah Banteidor ki la nohsynñiang mar T. 1 lak sha ka Seng Kynthei Jaïaw Langsning.
