Shillong, Nohprah 12
U trai dukan uba shong die ja barabor ha Stand Taxi Jaïaw kaba don ha Motphran u la hap ban phah rah sha ïa ki nongtrei namar um sngewïahap ban shu beh ïa ki haba ki la trei bad u baroh shikatta. Kane ka wan jia watla kam don ïew shuh haba u shong die dukan ja ha Umsohsun hadien ba la pynpra ïa ka Stand Taxi Jaïaw.
Ka jingpynpra ka tnad Municipal ïa ka jaka ïeng Local Taxi na Jaïaw ha Motphran ka long ban tei thymmai ïa kane ka jaka.
Haba la pynpra ïa kane ka jaka ïeng taksi, ïa ki dukan ja la rah shajrong kaba don syndah bad ka Stand Taxi kaba hap ha Umsohsun tangba ki paidbah ki hap ban ïaid najan Mahari.
Haba ïoh ïakren bad uwei na ki trai dukan u la pynpaw ba naduh ba ki la wan shong ha ka dukan bathymmai ka la hiar bha ka ïew namar na ka 100 percent kiba wan bamja ki poi tang 5 percent.
U la ïathuh ba u buh nongtrei haduh saw ngut bad mynta u hap ban phah rah sha ïa ki nongtrei ba kin leit tyrwa tang ban ïoh kamai namar ban beh ïa ki um sngewïahap haba ki la trei bad u ha kine ki snem.
U la ïathuh biang ba ynda la dep shna ïa ka jaka ïeng kali kaba thymmai kin sa ïoh ban rung biang.
Katba ka dukan ja syrwa kaba ju die 15 kilo haduh 20 kilo shi sngi haba ki buh dukan ha kane jaka ïeng taksi mynta kim lah die wat tang 2 kilo shisngi.
Ki la ïathuh ba ki don kiba ïoh jingtip ki la wan wad hi ïa ka dukan ja hynrei ïa kito ki bym tip lada ïohi ba ki ïaid lynti ha surok la shu pyrta ïa ki watla ki don shajngai.
La ïathuh ba ka dukan ja syrwa ka la sdang nyngkong na jingkieng Motphran hadien ba la pynpra la rah sha jaka ïeng taksi ha Jaïaw bad mynta sha Umsohsun.
Kum ban shu pynkynmaw ki nongdie jaiñ ka Khasi Market ki la mih nyngkong na khrum jaka ïeng taksi Jaïaw ban leit shong sha Garikhana. Kine kin sa wan shong biang ynda la dep shna ïa ki dukan ha jaka ïeng taksi ha Jaïaw.
