Shillong, Nohprah 12
Namar ka jingleh kyllut jong ka sorkar ban maramot ïa ka surokbah kaba don ha ki thaiñ Lumdiengjri, na ka liang ki pulit pynïaid kali jong ka Traffic Branch Lumdiengjri East Khasi Hills District ki la hap ban mih bad maramot hi dalade ïa katei ka surok kaba la jot rathai namar kane ka surok ka la buh jingeh ïa ki kali kiba ïaid lyngba katei ka surok bad kumjuh ruh ka la wanrah ka jingdheng kali kaba jur ha kitei ki bynta.
Dang shen, na ka liang kitei ki pulit pynïaid kali ki la maramot hi dalade ïa katei ka surok da kaba siang khyndew ha ki thliew kiba lah ban wanrah jingma ïa ki nongleit nongwan.
Watla ha shwa katei ka jingmaramot, kitei ki pulit pynïaid kali ki la phah da ka jingthoh sha ka tnat PWD (Roads) ba kan peit bad khmih halor kane ka jingeh jong ki paidbah bad ban maramot noh mardor ïa katei ka surok. Pynban na ka liang katei ka tand ka khlem shym la leh eiei satia halor kane. Kumta ka la pynlong ïa kitei ki pulit pynïaid kali ban mih biang sa shisien ha ka sien kaba ban maramot hi dalade ïa katei ka surok.
Shuh shuh lyngba ki dur khih ba la ïohpdiang, la ïohi ba ki pulit pynïaid kali ki la hap ban kit khyndew hi da ka kali Gypsy kaba ki ju pyndonkam ha ki kam ba man ka sngi.
