Jowai, Nohprah 12
Haduh 400 ngut ki khynnah pule Class X kiba la pyndep ïa ka 2nd Free Tuition Programme 2023 ba la kyrshan da u MLA ka Jowai Constituency, ki la ïoh pdiang ïa ki tiar pyndonkam ha ka por thoh eksamin kum ki let, khulom, scale, cardboard bad kiwei kiwei.
Ïa kine ki tiar thoh eksam la sam ha ka jingïalang pynkut jong ka 2nd Free Tuition Programme 2023 kaba la long ha Ïungwalieh Tpep Pale ha ka Sngi Ba Ar.
U MLA ka Jowai, u Bah Wailadmiki Shylla, ha ka jingkren u la ban jur ïa ki khynnah skul ba kim dei ban kyrkieh ka shongkha khynnah, hynrei ban pyrkhat shwa ïa ka lawei ka jong ki kaei kaba ki kwah ban leh ha ka jingim ka jong ki bad ban pynleit jingmut bad trei shitom ha ki jingpule ki khnang ba ka lawei kan long kaba suk kaba saiñ.
U MLA u la pyntip ba ha u snem ba la leit ki khynnah kiba pass na kane ka Free Tuition ki long 83% bad u khmih lynti ba mynta u snem ki khynnah kin pass 100 percent. Nalorkata u la pyntip ruh ba ki khynnah kiba wan ha ka kyrdan Top List kin ïoh da ka song pisa.
U MLA u la ai khublei kyrpang ïa ki kmie ki kpa kiba shah sngewbha ïa ki khun jong ki ban wan sha kane ka jinghikai.
U MDC ka JHADC u Bah Octomewot Lamin bad ka Dr. Jasmine Lyngdoh, kaba long kawei na ki heh ka seng NPP, ki la kitbok kitwriang ïa baroh ki khynnah ba kin leh bha ha ka eksamin namar kane ka dei ka lad ba kin ïaid bad jop ïa ka thong kumba ki la pynkhreh.
Shwa kane u Eladmiki Suting, Manager Free Tuition, u la ïathuh ba kane ka Free Tuition Programme 2023 la mang kyrpang na ka bynta ki khynnah Class X jong ka 2-Jowai Constituency ki ban ïakhun ïa ka eksamin Matrik ne SSLC 2024. Kane ka Free Tuition ka don 6 tylli ki Centre bad ki khynnah ki ïoh jinghikai haduh 45 sngi ha ki artylli ki sobjek ka Mathematics bad Science.
U la pyntip ruh ba mynta u snem ki don ruh ki khynnah na East bad West Jaiñtia Hills District kata na Dawki shaduh Ratacherra bad baroh ki khynnah Class X kiba wan shah hikai ki long 400 ngut.
