Baghmara, Nohprah:
Ka Achik Holistic Awakening Movement (AHAM) ka la pynpaw ka jingsngewkhia haba ïadei bad kawei ka skul ha ka thaiñ Gasupara, South Garo Hills (SGH) halor ka jingbym don nonghikai mynta la lai snem kynthih, ha kawei ka liang kaba la ïalam sha ka jingsangeh leit skul jong kiba bun ki khynnah.
Ïa kane la lap ha ka shnong Wakebokgre ha kaba katei ka skul Government LP kam shym la don nonghikai mynta la lai snem kynthih.
Ka kynhun hapoh ka jingïalam ka AHAM – Gasuapara Unit bad AHAM CEB HQ General Secretary, u Clinton R. Marak ki la leit jngoh ïa katei ka shnong ha ka Sngi Ba-ar hadien ka jingujor na ki nongshong shnong halor ka jinglong-jingman hapoh ka shnong bad kumno ki khynnah ki la shah pynduh noh ïa ka hok ban pule.
“Kane ka long kaba sngewsih shi kat dei. Ka jinglong-jingman ka pule-puthi ha ka kyrdan Primary ka dei ka nongrim ha kaba la ithuh ïa ka imlang-sahlang bad da kaba ïaid ha kane ka lynti, ki khynnah jong ngi ki la shah ieh noh shadien khlem kano-kano ka daw jong ki. Kaei ka jingbakla jong ki ba wat hapdeng ka jingkwah ban pule – kaba ïoh ei, ki la shah pynduh noh ha kane ka rukom? Kane ka la ïalam sha ka jinglong-jingman ha kaba ki khynnah ki la pep skul noh shiteng por bad ki don sa tang ki kamra klas kiba thylli,” la ong u Clinton.
Ki dkhot ka AHAM ki la ong ba nalor ka jingbym don nonghikai, ka skul ka ïakynduh jingeh ruh ha ka liang ki jingdonkam. Khlem kine, ki la ong ba la wanrah ka jingtynjuh na bynta ki khynnah bad ki nonghikai kumjuh.
“Kane ka ktah shi kat dei ïa ki nongshong shnong (ba duna ka ïoh ka kot) bad ka pule-puthi bad kdew ïa ka jingbym larkam jong ki bor pynïaid skul. Ka long kaba donkam ban shimkhia mardor ïa kine ki kam ban pyntikna ba baroh ki khynnah ki ïoh ka pule-puthi kaba paka,” u la bynrap.
Na ka liang ka AHAM ka la kyntu ïa ki bor ba dei khmih ban leh eiei noh mardor ban pynbeit ïa kine ki jingeh, ha kajuh ka por ban pynbiang ïa ki jingdonkam bad jingkyrshan sha ka skul.
“Man la ki khynnah ki don hok ban pule ha ka jinglong-jingman ka ba bit ba biang bad kaba ïoh jingkyrshan, bad ka long kaba donkam ba ngi trei ban kynjoh ïa kane ka thong,” u sngew.
Ka SGH ka long kawei na ki distrik kaba leh sniew bha ha ka liang ka pule-puthi, ka tnad treikam kaba ïa mynta la khmih da u MLA ka Rongara – Siju, u Rakkam Sangma. Watla ka kam thung nonghikai ka la sdang hapoh ka Jylla ban pyndap ïa ki jaka ba suda, kiba bun ki skul hapoh ka distrik (palat 50) ki dang ïai ap ïa ka jingkut jong ki jingeh – ban ïoh ïa ka jingpule kaba paka naduh ka kyrdan pule Primary.
“Ka distrik jong ngi ka la leh sniew hynrei hato phi lah mo ban kynnoh ïa ki khynnah na bynta kane? Haba la shu ieh noh ïa ka kyrdan pule Primary, hato ka jingpule ba shajrong ka lah ban wanrah jingkylla? Kane ka jingkylli ym tang ba ka long kaba donkam hynrei ka jingshisha jong kaei kaba jia ha SGH. Ngi kyrpad ïa kito kiba don ha ka bor ym tang ban shimkhia ïa kane, hynrei na bynta ka pule-puthi kaba kham bha ka ban sdang naduh ka kyrdan pule Primary,” ki la bynrap.
